Qazaqstanda shaǵyn kemelerdi tirkeý jyl sońyna deıin avtomattandyrylady

ASTANA. 21 qazan. QazAqparat - Qazaqstanda sý kóligi salasynda shaǵyn kemelerdi tirkeý (qaıyqtar jáne gıdrotsıklder) jáne olardy basqarýǵa quqyq beretin kýálik berý qyzmetteri 2013 jyldyń sońyna deıin avtomattandyrylady. Bul týraly QR Kólik jáne kommýnıkatsııa mınıstrliginiń baspasóz qyzmetinen habarlady.

Vedomstvonyń aqparatyna qaraǵanda, qalǵan qyzmetterdi avtomattandyrý 2014-2015 jyldarǵa josparlanǵan.

«Memlekettik qyzmetterdi avtomattandyrý mańyzdy. Sebebi, sý kólikterin tirkeý kezinde Kólik jáne kommýnıkatsııa mınıstrliginiń aımaqtyq bólimderi tarapynan jiberiletin buzýshylyqtardy boldyrmaý úshin qajet. Qyzmet avtomattandyrylǵan soń, qyzmetti alýǵa ótinimdi elektrondyq úkimettiń www.egov.kz portaly arqyly berýge bolady», - delingen habarlamada.

2013 jyldyń 9 aıy boıynsha Kólik jáne kommýnıkatsııa mınıstrliginiń aımaqtyq organdary 3477 ret kemelerge tekserý júrgizip, 1012 ákimshilik quqyq buzýshylyqty anyqtaǵan. 4,9 mln. teńgege aıyppul salǵan.

Sý kóligindegi baqylaý basqarmasynyń basshysy Arlan Zakarıanovtyń aıtýynsha, qazaqstandyq keme júrgizýshilerge negizinen kemelerdi ruqsat qujatynsyz basqarǵany, kemelerin tehnıkalyq baıqaýdan ótkizbegeni nemese kemelerdi tirkemegeni úshin aıyppul salynady. «Flottaǵy apatty jaǵdaılardyń aldyn alýǵa baǵyttalǵan is-sharalarymyz bar. Osy sharalarǵa sáıkes, aldyn-alý sharalaryn júrgizemiz, BAQ arqyly zańnamalardy túsindiremiz, baqylaý sharalaryn júrgizemiz. Bul is-sharalardyń barlyǵy birinshi kezekte, keme júrgizýshileriniń zań buzýshylyqtarǵa jol bermeýine baǵyttalǵanyn aıtyp ótý kerek», - dedi ol.

Kemeler men keme júzetin sý joldaryn baqylaý sharalaryn kúsheıtýdiń arqasynda qazaqstandyq flottaǵy apatty jaǵdaılar 2013 jyldyń 9 aıynda 2012 jyldyń sáıkes merzimimen salystyrǵanda 18-den 13-ke deıin azaıyp otyr.