Qazaqstanda shaǵyn jáne orta bıznestiń ekonomıkaǵa qatysýy 36,5%-ǵa deıin ósti
ASTANA. KAZINFORM – Sońǵy jyldary jalpy ishki ónimde shaǵyn jáne orta bıznes úlesiniń ósýi baıqalady. Bul týraly QR Ulttyq ekonomıka mınıstri Álibek Qýantyrov aıtyp berdi.
Onyń aıtýynsha Úkimet bıznesti júrgizý jaǵdaılaryn jaqsartý jáne ákimshilik júktemeni azaıtý sharalaryn, kásipkerlik sektordy memlekettik yntalandyrý sharalaryn da iske asyryp jatyr.
«Kásipkerlikti damytý – ulttyq ekonomıkany ornyqty damytýdyń mańyzdy faktory. Resmı statıstıka derekterine sáıkes, sońǵy jyldary jalpy ishki ónimde shaǵyn jáne orta bıznes úlesiniń ósýi baıqalady. 2021-2023 jyldary qazaqstandyq shaǵyn jáne orta bıznestiń ekonomıkaǵa qatysýy 33,5%-dan 36,5%-ǵa deıin 3 paıyzdyq tarmaqqa ósti. Ótken jyly jumyspen qamtylǵandardyń jalpy sany 10,4%-ǵa artyp, 4,3 mln adamǵa jetti», - dedi Álibek Qýantyrov Úkimet otyrysyndaǵy baıandamasynda.
Búgingi tańda bıznesti memlekettik qoldaýdyń suranysqa ıe sharalarynyń biri – «Bıznestiń jol kartasy» jáne «Qarapaıym zattar ekonomıkasy» baǵdarlamalary bolyp otyr. 2023 jyly kredıt somasy shamamen 1 trln teńge bolatyn 12 myńnan astam bıznes jobasy kredıtterdi sýbsıdııalaý arqyly jeńildetilgen qarjylandyrý sharalarymen qamtyldy. 340 mlrd teńgege 8 myń joba boıynsha kepildik berildi.
Qarjylyq emes qoldaý aıasynda 10 myńǵa jýyq kásipker oqytyldy, kásipkerliktiń túrli máseleleri boıynsha 166 myńnan astam konsýltatsııa berilgen.
«Bıylǵy bıýdjette shaǵyn jáne orta bıznestiń 40 myń jobasyn jáne 20 myń jańa jobany qoldaýǵa shamamen 300 mlrd teńge kózdeldi. Óńirler bólinisinde sýbsıdııalaý jobalarynyń basym bóligi Almaty, Astana, Shymkent qalalarynda, Almaty jáne Aqtóbe oblystarynda iske asyryldy. Al Ulytaý, Jetisý jáne Abaı oblystarynda joba az. Salalar boıynsha óńdeý ónerkásibi, kólik, qoımalaý jáne bilim berý jobalary basym», - deıdi Ulttyq ekonomıka mınıstri.
