Qazaqstanda shaǵyn modýldik reaktorlary bar AES salý múmkindigi zertteledi
ASTANA. KAZINFORM – Qazaqstanda atom salasyn damytý strategııasy aıasynda shaǵyn modýldik reaktorlar (ShMR) negizindegi atom elektr stantsııalaryn paıdalaný múmkindigi qarastyrylady.
Josparǵa sáıkes, ShMR tehnologııalaryn ulttyq jaǵdaılarda qoldanýǵa tehnıkalyq-ekonomıkalyq taldaý júrgiziledi. Bul rette óńirlik erekshelikter, senimdilik talaptary jáne jobalardyń ekonomıkalyq tıimdiligi eskerilmek.
– Strategııany iske asyrý aıasynda shaǵyn modýldik reaktorlardyń ulttyq jaǵdaılarda qoldanylý múmkindigine tehnıkalyq-ekonomıkalyq taldaý júrgizý josparlanýda. Bul rette óńirlik erekshelikter, senimdilik talaptary jáne jobanyń ekonomıkalyq tıimdiligi eskeriletin bolady, – delingen qujatta.
Sonymen qatar Qazaqstan ShMR ázirleý jáne jobalaý baǵytyndaǵy ǵylymı-zertteý jumystaryna qatysýdy kózdep otyr.
– Shaǵyn modýldik reaktorlardy ázirleý jáne jobalaý boıynsha ǵylymı-zertteý qyzmetine qatysý, sondaı-aq olardy ornalastyrýdyń basym aýdandaryn aıqyndaý josparlanýda. Atap aıtqanda, energııa tapshylyǵy bar óńirler, elektr jelilik ınfraqurylymy álsiz damyǵan aımaqtar jáne eskirgen jylý elektr stantsııalaryn almastyrý múmkindigi qarastyrylady, – dep atap ótilgen.
Mamandardyń pikirinshe, bul baǵyt energetıkalyq júıeni ártaraptandyrýǵa jáne óńirlerdegi energııa tapshylyǵyn azaıtýǵa múmkindik beredi.
Aıta keteıik, Prezıdent atom salasyn damytýdyń 2050 jylǵa deıingi strategııasyn bekitti.
