Qazaqstanda shaǵyn bıznestiń ósimpuly men aıyppulyn esepten shyǵarý tártibi bekitildi

ASTANA. KAZINFORM – QR Qarjy mınıstriniń buıryǵymen shaǵyn bıznes sýbektilerine qatysty ósimpuldar men aıyppul somalaryn esepten shyǵarý qaǵıdalary bekitildi.

Qaǵıdalarǵa sáıkes, shaǵyn kásipkerlik sýbektileriniń tómendegi somalary esepten shyǵarylady:

Birinshiden, salyq tóleýshiniń jeke shotynda 2026 jylǵy 1 qańtardaǵy jaǵdaı boıynsha esepte turǵan ósimpul, sondaı-aq sol kúngi jaǵdaı boıynsha esepte turǵan bereshek somasyna 2026 jylǵy 1 qańtardan bastap tólengen kúnge deıingi kezeńge, tólem jasalǵan kúndi qosa alǵanda, eseptelgen ósimpul – bereshek ótelgen salyq nemese bıýdjetke tólenetin basqa da mindetti tólem túri boıynsha.

Ekinshiden, Salyq kodeksi men Ákimshilik quqyq buzýshylyq týraly kodekske sáıkes salyq salý salasyndaǵy quqyq buzýshylyqtar úshin memlekettik kirister organdary salǵan jáne 2026 jylǵy 1 qańtardaǵy jaǵdaı boıynsha salyq tóleýshiniń jeke shotynda esepte turǵan aıyppul – bereshek ótelgen salyq nemese bıýdjetke tólenetin basqa da mindetti tólem túri boıynsha.

Úshinshiden, 2026 jylǵy 1 qańtardaǵy jaǵdaı boıynsha tóleý merzimi salyq zańnamasyna jáne QR ońaltý jáne bankrottyq týraly zańnamasyna sáıkes ózgertilgen salyq nemese bıýdjetke tólenetin basqa da mindetti tólem boıynsha salyqtyq mindetteme 2026 jylǵy 1 sáýirge deıin tolyq kólemde oryndalǵan jaǵdaıda ósimpuldar men aıyppuldar.

Tórtinshiden, 2026 jylǵy 1 qańtarǵa deıin júzege asyrylǵan aınalymdar boıynsha QQS tóleýshi retinde tirkelmegen kezeńdegi aınalym úshin Ákimshilik quqyq buzýshylyq týraly kodekske sáıkes memlekettik kirister organdary salǵan jáne salyq tóleýshiniń jeke shotynda esepte turǵan aıyppul.

Bul rette mindetti shart – shaǵyn kásipkerlik sýbektileriniń 2026 jylǵy 1 qańtardaǵy jaǵdaı boıynsha esepte turǵan salyqtar men bıýdjetke tólenetin basqa da mindetti tólemder boıynsha bereshek somasyn 2026 jylǵy 1 qańtar men 31 naýryz aralyǵynda tolyq óteýi.

Esepten shyǵarýǵa jatpaıtyn somalar da aıqyndalǵan. Atap aıtqanda, jeke tulǵanyń kásipkerlik qyzmetine jáne jeke praktıkasyna baılanysty emes salyqtyq mindettemeleri boıynsha qalyptasqan ósimpuldar, sondaı-aq kásipkerlik qyzmetke qatysy joq salyq zańnamasyn buzǵany úshin jeke tulǵalarǵa salynǵan aıyppuldar esepten shyǵarylmaıdy.

Ósimpuldar men aıyppuldardy esepten shyǵarý salyq tóleýshilerdiń jeke shottaryna júrgiziletin túgendeý qorytyndysy boıynsha júzege asyrylady. Túgendeý komıssııa qurylǵan kúnnen bastap 2026 jylǵy 31 naýryzǵa deıin júrgiziledi.

Buıryq 2026 jylǵy 24 aqpannan bastap qoldanysqa engiziledi jáne 2026 jylǵy 1 qańtardan bastap týyndaǵan quqyqtyq qatynastarǵa qoldanylady.

Buǵan deıin Memleket basshysy Qasym-Jomart Toqaev shaǵyn jáne orta bızneske qatysty jospardan tys tekserýlerdi toqtatý qajettigin málimdegen edi.