Qazaqstanda shaǵyn bıznesti sýbsıdııalaý sharttary ózgeredi
ASTANA. KAZINFORM – Qazaqstanda «Іsker aımaq» shaǵyn bıznesti qoldaýdyń biryńǵaı baǵdarlamasy aıasynda syıaqy mólsherlemesiniń bir bóligin sýbsıdııalaý qaǵıdalary ózgerdi. Tıisti túzetýler Úkimettiń 2026 jylǵy 18 tamyzdaǵy qaýlysymen engizildi.
Ózgeristerge sáıkes, ekonomıkalyq qyzmettiń basym baǵyttary boıynsha jobalardy júzege asyryp jatqan nemese júzege asyrýdy josparlaǵan kásipkerler sýbsıdııa ala alady. Bul rette jobanyń iske asyrylatyn jeri men kásipkerdiń tirkelgen jeri eskeriledi.
Qazaqstannyń óńirleri men aýdandarynda basym salalar tizimine ekonomıkalyq qyzmet túrleriniń jalpy jikteýishi boıynsha alty kodtan artyq engizýge bolmaıdy.
Áleýmettik kásipkerlik sýbektilerine salalyq shekteý qoıylmaıdy. Olardyń jobalary tıisti tizilimde kórsetilgen qyzmet túrleri boıynsha sýbsıdııalanady. Bul rette de jobanyń iske asyrylatyn jeri men kásipkerdiń tirkelgen jeri eskeriledi.
Ózgeristerde ınvestıtsııalyq jobalarǵa qoıylatyn talaptar da naqtylandy. Sýbsıdııa ınvestıtsııa salýǵa jáne aınalym qarajatyn tolyqtyrýǵa baǵyttalǵan jańa qarjy quraldary boıynsha beriledi.
Investıtsııalyq shyǵyndarǵa negizgi quraldardy, onyń ishinde kommertsııalyq jyljymaıtyn múlik, jabdyq, tehnıka, kólik, bıologııalyq, materıaldyq jáne materıaldyq emes aktıvterdi satyp alýǵa jumsalatyn qarajat jatady. Sondaı-aq kásipkerlik qyzmette paıdalanylatyn nysandardy salý, jańǵyrtý, rekonstrýktsııalaý jáne kúrdeli jóndeý shyǵyndary da osy sanatqa kiredi.
Investıtsııalyq jobalar aıasynda negizgi quraldar, jabdyq, tehnıka, kólik, qurylys materıaldary jáne basqa da aktıvter tıisti tizilimge engen qazaqstandyq óndirýshilerden satyp alynýǵa tıis.
Eger tizilimde qajetti taýardy nemese jabdyqty óndiretin otandyq kompanııa bolmasa, kásipker ony basqa óndirýshilerden satyp ala alady.
Jobalardyń tıimdiligin baǵalaý kezinde Qarjy mınıstrligi Memlekettik kirister komıtetiniń derekteri, salyq deklaratsııasyndaǵy málimetter, sondaı-aq bıýdjetpen esep aıyrysýdyń jaı-kúıi týraly jeke shottan alynǵan úzindi kóshirme paıdalanylady.
Eger kásipker belgilengen tıimdilik kórsetkishterin oryndaı almasa, oǵan bir qarjy jylynan aspaıtyn qosymsha merzim berilýi múmkin. Ol úshin jobanyń iske asyrylyp jatqany jáne qarjy quralynyń maqsatqa saı paıdalanylǵany rastalýǵa tıis.
Mundaı qosymsha merzim jabdyqty jetkizý nemese ony iske qosý keshikkende, ruqsat qujattaryn alý ne ınjenerlik ınfraqurylymǵa qosylý sozylǵan jaǵdaıda berilýi múmkin. Bul rette keshigýdiń sebepteri kásipkerge baılanysty bolmaýǵa tıis.
Investıtsııalyq jobalardy sýbsıdııalaý merzimi sýbsıdııalaý bastalǵan kúnnen bastap 18 aıdan aspaıdy. Fors-major jaǵdaıynda, zańnamaǵa eleýli ózgerister engizilse nemese kútpegen tehnıkalyq, ekonomıkalyq jáne óndiristik jaǵdaılar týyndasa, qosymsha alty aıǵa deıin merzim berilýi múmkin.
Sýbsıdııa nomınaldy mólsherlemesi Ulttyq banktiń bazalyq mólsherlemesine tórt paıyzdyq tarmaq qosylǵan deńgeıden aspaıtyn qarjy quraldary boıynsha beriledi.
Áleýmettik kásipkerlik sýbektileriniń tizilimine engizilgen kásipkerler úshin sýbsıdııa mólsheri nomınaldy syıaqy mólsherlemesiniń 50%-y. Mólsherlemeniń qalǵan bóligin kásipker ózi tóleıdi.
Baǵdarlamaǵa qatysatyn lızıngtik kompanııalarǵa qoıylatyn talaptar da belgilendi. Lızıngtik kompanııanyń sońǵy esepti kezeńdegi qarjylyq eseptilikpen rastalǵan menshikti kapıtaly keminde 1 mlrd teńge bolýy tıis. Sonymen qatar kompanııa ótinim bergenge deıin negizgi qyzmetin keminde bir jyl júrgizýge tıis.
Sýbsıdııa alý úshin kásipker qarjy ınstıtýtyna ótinish beredi. Qarjy ınstıtýty jobanyń qarjylyq-ekonomıkalyq tıimdiligin baǵalap, oń sheshim qabyldaǵannan keıin qujattar qarjy agenttiginiń fılıaldaryna qaraýǵa jiberiledi.
Qaraý qorytyndysy boıynsha sýbsıdııa berý, odan bas tartý nemese jobany pysyqtaýǵa jiberý týraly sheshim qabyldanady.
Qaýly 2026 jylǵy 31 tamyzdan bastap qoldanysqa engiziledi.
Buǵan deıin elimizde jarty jylda shaǵyn jáne orta bıznes sýbektileriniń sany shamamen 550 myńǵa artqanyn jazǵan edik.
