Qazaqstanda shaǵyn bızneske qatysty salyq eseptiligi ózgerýi múmkin
ASTANA. KAZINFORM — Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen Salyq kodeksin engizý jónindegi jobalyq keńseniń 15-otyrysynda kezekti salyqtyq ákimshilendirý jáne salalyq retteý máselesi qaraldy, dep habarlaıdy Úkimettiń baspasóz qyzmeti.
Vedomstvonyń baspasóz qyzmeti málim etkendeı, otyrys taqyrybynyń biri — aqsha-kredıt naryǵy operatsııalary boıynsha tabysqa salyq salý.
2025 jylǵy 1 qańtardan bastap 2026 jylǵy 1 qańtarǵa deıin aqsha-kredıt naryǵy operatsııalary boıynsha jekelegen kiris túrlerine salyq salýdyń arnaıy tártibi qoldanyldy. Osyǵan baılanysty korporatıvtik tabys salyǵyn tóleýshilerde korporatıvtik tabys salyǵy boıynsha avanstyq tólemdi esepteý jáne tóleý tártibin, sondaı-aq salyq eseptiligin jasaý qaǵıdasyn túzetý qajettigi týyndady.
Burynǵy Salyq kodeksiniń normalaryna sáıkes, 2025 jylǵy aqsha-kredıt naryǵynyń operatsııalary boıynsha kiristerge 10% mólsherleme boıynsha salyq salyndy. Bul rette salyq bazasy aıaqtalǵan salyq kezeńiniń qorytyndysy boıynsha ǵana qalyptasyp, bir rettik qana sıpatta boldy.
— Sonymen qatar qoldanystaǵy normalar mundaı salyq somasyn KTS boıynsha avanstyq tólem esebine qosýdy kózdeıdi. Ulttyq bank ókiliniń pikirinshe, bul avanstyq tólem mólsheriniń negizsiz ulǵaıýyna alyp keledi. Óıtkeni 2026 jyly aqsha-kredıt naryǵynyń operatsııalaryna budan bylaı qosymsha salyq salynbaıdy. Osyǵan baılanysty KTS boıynsha avanstyq tólemderdi esepteý jáne tóleý tártibine, sondaı-aq salyq eseptiligin jasaý qaǵıdalaryna, onyń ishinde eseptelgen avanstyq tólemder somasy men eseptelgen KTS somasy arasyndaǵy aıyrmany esepteýge ózgerister engizý usynylady. Óz tarapynan Qarjy mınıstrligi bul usynysty qoldady, — delingen habarlamada.
Sondaı-aq otyrysta densaýlyq saqtaý salasynda QQS biryńǵaı ótpeli mólsherlemesin engizý múmkindigi taǵy da talqylandy. Qatysýshylar biryńǵaı stavka qajet degen pikirge kelgenmen, onyń kólemine baılanysty pikirtalas jalǵasyp jatyr.
Eske salsaq, 2026 jylǵy 1 qańtardan bastap, dárilik zattardy, medıtsınalyq buıymdardy, jınaqtaýshy jáne tehnıkalyq kómekshi quraldardy satý jáne ımporttaý boıynsha aınalymǵa 5% mólsherinde QQS tómendetilgen mólsherlemesi belgilendi. Al 2027 jylǵy 1 qańtardan bastap ol 10% bolady.
Bul rette orfandyq jáne áleýmettik mańyzy bar aýrýlardy emdeýdi qosa alǵanda, TMKKK jáne MÁMS sheńberinde kórsetiletin dárilik zattar men medıtsınalyq qyzmetterdi ótkizý jáne ımporttaý boıynsha aınalymdar QQS-tan bosatyldy. Otyrysqa qatysýshylardyń aıtýynsha, jeńildikti jáne bosatylǵan rejımderdiń úılesýi salyqty ákimshilendirýde qıyndyqtar týǵyzady.
Talqylaý qorytyndysy boıynsha Serik Jumanǵarın yqtımal mólsherlemeniń parametrlerin jáne onyń sala men bıýdjetke áserin qosymsha esepteýdi tapsyrdy.
Taǵy bir másele jeńildetilgen salyq rejımin qoldanatyn sýbektiler úshin 200-nysandy tapsyrý mindetin joıý múmkindigi boldy.
Salyq keńesshisi Aıjan Balakeshova búginde mundaı eseptilikti iri kompanııalarmen qatar shaǵyn bıznes sýbektileri az jumysshylarmen birge tapsyratynyn atap ótti. Bul ákimshilik júktemeni arttyryp, egjeı-tegjeıli esepke alýdy, qosymsha býhgalterlik shyǵyndy talap etedi. Qatelikter men aıyppul qaýpi de artady.
MKK tóraǵasynyń orynbasary Janybek Nurjanov 200-nysan jaldamaly jumyskerleri bar kompanııalar úshin ǵana qarastyrylǵanyn, eń aldymen áleýmettik tólemderdi ýaqtyly esepke alý jáne jumyskerlerdiń quqyǵyn qorǵaý úshin qajet ekenin túsindirdi.
Ol sondaı-aq qoldanystaǵy arnaýly salyq rejımi burynǵydan aıtarlyqtaı erekshelenetinin atap ótti: búgingi tańda ASR qoldaný shegi 2,6 mlrd teńge. Al kompanııalar aınalymǵa jylyna 103,8 mln teńgege jetken kezde eńbekaqy tóleýge arnalǵan shyǵystar boıynsha shegerimderdi paıdalana alady jáne QQS-qa qoımaı jumys isteı alady.
MKK derekteri boıynsha, osy jylǵy aqpanda jeńildetilgen deklaratsııany usynǵan 1,2 mln salyq tóleýshiniń 800 myńǵa jýyǵynyń áleýmettik tólem boıynsha bereshegi bolǵan. Vedomstvo toqsan saıynǵy esep berý bızneske júktemeni birkelki bólýge múmkindik berip, qaryzdyń jınaqtalý qaýpin azaıtady dep sanaıdy.
MKK ustanymyn Eńbek jáne halyqty áleýmettik qorǵaý mınıstrliginiń ókilderi qoldap, 200-nysan jaldamaly jumyskerlerdiń tabystaryn esepke alýdyń ashyqtyǵy men áleýmettik mindettemelerdi baqylaý úshin qajet ekenin atap ótti.
Otyrys qorytyndysy boıynsha Serik Jumanǵarın shaǵyn jáne orta bıznes sýbektileri úshin 200-nysanyn saqtaý qajettiligin qosymsha taldaýdy tapsyrdy.
Budan buryn Ulttyq ekonomıka mınıstriniń orynbasary Arman Qasenov Senattaǵy Úkimet saǵatynda kommýnaldyq ınfraqurylymdy jańǵyrtýǵa baǵyttalǵan ınvestıtsııalyq jobalar tarıfti ınflıatsııa deńgeıinde ǵana ósiretinin aıtty.
