Qazaqstanda shabdaly men órik baǵasy qansha
Kazinform jazda suranysqa ıe shabdaly men órik baǵasyn salystyrdy.
Jaz bastalǵan sátten-aq Qazaqstandaǵy bazar men sýpermarkette jemis-jıdek kóbeıdi. Óńirlerde shabdaly men óriktiń baǵasy surpyna qaraı ártúrli. Biz «jemis-jıdek ındeksin» jasap, qaı óńirde arzan, qaı qalada baǵa joǵary ekenin anyqtadyq.
Shabdaly: kelisi 700-4500 teńge aralyǵynda
Shabdaly Qonaev qalasynda arzan. Munda baǵa 700-1000 teńge. Al Almatyda 800-1000 teńge bolyp tur. Sonymen birge Taldyqorǵanda shamamen 900 teńgege satyp alýǵa bolady.
Pavlodar qalasynda shabdalynyń bir kelisi 1400-1800 teńgege satylyp jatyr. Al Túrkistan men Petropavlda — 1500-1800 teńge.
Tarazda baǵa 1480 teńgeden bastalady. Іri ári túgi bar shabdaly 2200-2500 teńge turady. Al qabyǵy jumsaq shabdaly baǵasy — 1480-1600 teńge. Qyzylordada baǵa — 1500-2500 teńge.
Shymkentte kelisi — 1700-2500 teńge. Al nektarın jáne injir surypty jemistiń kelisi 1800-1950 teńge turady.
Qaraǵandy men Jezqazǵan elimiz boıynsha jemis baǵasy joǵary óńirler qataryna kiredi. Munda nektarın kelisi 2670, qabyǵy jumsaq shabdaly 1980-3670 teńge.
Astanada shabdalynyń ortasha baǵasy 2389 teńge, al nekterın quny — 1899 teńge.
Aqtaý, Atyraý, Óskemen men Semeıde baǵa shamamen 2000 teńge.
Qostanaıda jumsaq shabdalynyń kelisi 2150 teńge, al injir tuqymdasy 3500 teńgege baǵalanady.
Aqtóbede surpyna qaraı baǵa 2269-3500 teńge aralyǵynda.
Al eń qymbat shabdaly Kókshetaý (kelisi 2500 teńge) men Oralda satylady. Oralda injir tuqymdas shabdaly 4500 teńgege satylyp jatyr.
Órik: kelisi 400-1950 teńge aralyǵynda
Eń arzany Túrkistan (400-500 teńge) men Almatyda (500-700 teńge) satylyp jatyr.
Qonaevta óriktiń kelisi 600-650 teńge, al Qyzylordada 600 teńge. Taraz qalasynda kelisi 610-700 teńge.
Taldyqorǵanda kóterme baǵa 700 teńge, al kelisi 1000-1250 teńge.
Aqtóbede jemistiń qaıdan tasymaldanǵanyna baılanysty baǵa 799-969 teńge aralyǵynda bolyp tur.
Semeı men Óskemende óriktiń kelisi — 800-1000 teńge.
Astanada óriktiń baǵasy orta eseppen 1199 teńge, al Qostanaıda usaǵy 900-1100 teńgege, irisi 1450 teńgege satylyp jatyr. Al Petropavlda — 980 teńge.
Eń qymbaty Oral qalasynda. Munda bal surypty órik quny 1950 teńge bolsa, Shymkenttiń órigi 1450 teńgege satylady. Al Pavlodarda — 1200- 1600 teńge aralyǵynda.
Qaraǵandy men Jezqazǵanda baǵa shamamen 1500 teńge, al bal surypty óriktiń kelisi 1300 teńgege satylyp jatyr.
Shymkentte kelisi — 1400-1600 teńge. Al Atyraýda — 1500 teńge. Kókshetaý qalasynda baǵa — 1600 teńge. Aqtaýda kelisi 2000 teńge.
Maýsymdyq jemis-jıdek quny óńirlerdiń qaıda ornalasqanyna baılanysty bolyp tur. Ádettegideı eń arzan jemis elimizdiń ońtústiginde satylady. Al elimizdiń soltústik jáne shyǵys óńirlerinde baǵa joǵary. Degenmen jemistiń bul túri áli de kóbeıip, baǵa túsedi.
Kazinform tilshisi buǵan deıin ekzotıkalyq jemis-jıdek, qurma, qııar men qyzanaq, sonymen birge farsh, shaı men kofe, irimshik pen súzbe baǵasyn salystyrdy.