Qazaqstanda seısmologııa turǵysynan qaýipti óńirler kóbeıdi
Qazaqstannyń batys óńirleri seısmologııa turǵysynan qaýipti aımaqqa aınalyp bara jatyr. Bul týraly Májilis depýtaty Edil Jańbyrshın aıtty, dep habarlaıdy QazAqparat tilshisi.
«Seısmologııa turǵysynan qaýipti jalǵyz Almaty qalasy men Almaty oblysy ǵana emes. Sonymen qatar, Atyraý, Mańǵystaý, Aqtóbe, Qyzylorda oblystarynyń aýmaǵy da seısmologııa jaǵynan qaýipti. Bul óńirlerde qarqyndy túrde munaı óndirý júzege asyrylǵan soń, jer qabatynda bos oryndar paıda boldy. Kez kelgen tabıǵı jer silkinisi tehnogendik dúmpýge ulasýy múmkin», - dedi E. Jańbyrshın Májilistiń Ekologııa jáne tabıǵatty paıdalaný máseleleri jónindegi komıtetiniń keńeıtilgen otyrysynda.
Osy oraıda bul másele asa mańyzdy ekenin jáne munaı-gaz ken oryndaryn qarqyndy ıgerý oryndarynda problema bolýy múmkin ekenin aıtty.
«Sondyqtan bizdiń óńirlerdegi qazirgi shynaıy geodınamıkalyq jaǵdaıdy kórgimiz keledi. Sebebi Túrkııada bolǵan apattan keıin bul taqyryp óte ózekti. Máselen, Aqtaýda turǵyn úıler salynǵan kezde qurylys normalary jáne erejelerinde 6 ball deńgeıindegi júıe kórsetilgen. Bul turǵyda arnaýly ınstıtýttardaǵy barlyq málimetti qarastyryp, tıisti derekterdi jınaqtaýdy suraımyz. ıAǵnı elimiz aýmaǵynda jer qabatynda bolyp jatqan ózgerister qandaı qaýip tóndirip turǵanyn tyńǵylyqty zertteý kerek», - dedi depýtat Tótenshe jaǵdaılar mınıstrligi ókilderine qarata aıtqan sózinde.
Óz kezeginde Tótenshe jaǵdaılar mınıstri Syrym Sháriphanov elimizde Seısmologııa ınstıtýty bar ekenin, ǵalymdar tıisti kartany jasaǵanyn aıtty.
«Almaty qalasynyń aýmaǵynda osy jumys aıaqtaldy. Ol kartany qurylys normalarymen aınalysatyn jergilikti organǵa tabystady. Qazir bul baǵyttaǵy jumystar shyǵys óńirde iske asyrylyp jatyr. Sonymen qatar, ınstıtýt mamandary elimizdiń batys óńirlerine baryp, aýqymdy zertteý jasaıdy. Shynymen de bul oblystarda munaı-gaz ken oryndaryn ıgerý saldarynan jer qabatynda bos oryndar paıda bolyp jatyr. Sondyqtan batys óńirlerde de seısmıkalyq jaǵdaı kúrdeli. Atap aıtqada ken oryndaryndaǵy jaǵdaıdy baqylaýda ustaımyz», - dedi mınıstr.
