Qazaqstanda Seısmologııa salasyn damytýdyń keshendi jospary qabyldandy
ASTANA. KAZINFORM – Memleket basshysynyń tapsyrmasyn oryndaý maqsatynda Seısmologııa salasyn damytýdyń 2024-2028 jyldarǵa arnalǵan keshendi jospary bekitildi.
Úkimettiń tıisti qaýlysyna QR Premer-Mınıstri Oljas Bektenov qol qoıdy, dep habarlaıdy Úkimettiń resmı saıty.
Qujat elimizdiń seısmologııalyq qaýipsizdigin nyǵaıtý boıynsha aýqymdy sharalardy iske asyrýdy kózdeıdi. Olardyń ishinde monıtorıngti aıtarlyqtaı kúsheıtý, ǵımarattar men qurylystardyń seısmıkalyq tózimdiligin qamtamasyz etý, jańa tsıfrlyq tehnologııalardy engizý, kadrlardy daıarlaý deńgeıin arttyrý jáne t. b. bar.
Osylaısha, 15 seısmıkalyq aýdandastyrý kartasy ázirlenetin bolady, bul elimizdiń seısmıkalyq qaýipti óńirlerindegi jer silkinisi oshaqtarynyń 70%-yn boljaýǵa múmkindik beredi. Sondaı-aq olar atalǵan aýmaqtardaǵy ǵımarattar men qurylystardy pasporttaýǵa jáne jańa qurylys normalaryn ázirleýge negiz bolady.
Pasporttaý eń osal qurylys obektilerin anyqtaýǵa múmkindik beredi, olarǵa qatysty birinshi kezekte seısmıkalyq qaýiptiligin tómendetý sharalary qoldanylady. Onyń ishinde: seısmıkalyq kúsheıtý, qundy jabdyqtardy qorǵaý nemese shyǵarý, maqsatyn ózgertý jáne basqalary bar.
Sonymen qatar 285 seısmıkalyq stansany ornatý, sondaı-aq qolda bar 70 stansany jóndeý jáne jaraqtandyrý kózdelgen. Bul Almaty oblysynda jáne elimizdiń basqa da seısmoqaýipti óńirlerinde seısmıkalyq qaýipti sapaly boljaýǵa múmkindik beredi. Óz kezeginde qajetti áreket etý sharalary jedel qabyldanatyn bolady.
Budan basqa, ǵımarattardyń qurylysy men jumys isteýine baqylaýdy kúsheıtý, monıtorıng ádisterin jaqsartý, seısmologııa salasyndaǵy mamandardy zamanaýı jabdyqtarmen jáne tehnıkalyq quraldarmen qamtamasyz etý josparlanýda.
Jalpy alǵanda, Keshendi jospardy iske asyrý nátıjesinde seısmıkalyq qaýipti aýmaqtardaǵy azamattardyń, qurylystar men ınfraqurylymnyń qorǵalý deńgeıi aıtarlyqtaı kúsheıýi tıis. Sondaı-aq jer silkinisi bolǵan kezde memlekettik organdar men beıindi uıymdar tarapynan den qoıý júıesi jetildiriletin bolady.
Seısmıkalyq qaýipsizdikti qamtamasyz etý – Úkimettiń basym baǵyttarynyń biri, óıtkeni Qazaqstannyń seısmıkalyq aımaqtary respýblıkanyń jalpy aýdanynyń shamamen 40%-yn alady. Elimizdegi seısmıkalyq qaýpi joǵary óńirler — Almaty jáne Shymkent qalalarynyń, Almaty, Jambyl, Qyzylorda, Túrkistan, Shyǵys Qazaqstan, Abaı jáne Jetisý oblystarynyń aýmaqtary.
