Qazaqstanda serjanttar akademııasyn qurý josparlanýda - Qorǵanys mınıstri
ASTANA. 23 mamyr. QazAqparat - Jaqyn jyldary Ulttyq qorǵanys ýnıversıtetiniń bazasynda serjanttar quramynyń akademııasyn qurý josparlanýda.
Bul týraly búgin serjanttardyń keńeıtilgen quramynyń Búkilarmııalyq keńesinde QR Qorǵanys mınıstri Ádilbek Jaqsybekov málim etti.
Onda serjanttardy birneshe mamandyq boıynsha daıarlaý qarastyrylatyn bolady. «Osy oraıda, kadettik korpýstyń bastyǵy Serjanttyq qurammen jumys basqarmasymen birlese otyryp, jańa oqytý júıesin qurýdyń egjeıli-tegjeıli josparyn qurýdy tapsyramyn. Oqytýshylar quramyn óz jumysynyń tájirıbeli mamany sanalatyn serjanttarmen kúsheıtý qajet», - dedi Á. Jaqsybekov.
Vedomstvo málimetteri boıynsha, jyl saıyn 500-ge tarta serjant Ulttyq qorǵanys ýnıversıteti, Qurlyq áskerleriniń áskerı ınstıtýty jáne Kadet korpýsynda tórt deńgeıli kýrs daıarlyǵynan ótedi. Kishi serjant quramynyń saýattylyǵyn jetildirý maqsatynda árbir gornızonda mobıldi oqý-jattyǵý toptary qurylǵan. Eki jyl ishinde atalmysh toptardan 6 myńnan astam serjant ótti.
