Qazaqstanda serııalyq medıtsınalyq preparattarǵa baqylaý qalaı júrgiziledi
«Keıingi birneshe jyldyń ishinde serııalyq dári-dármek pen medıtsınalyq preparattar boıynsha edáýir alǵa qadam bastyq. Jaǵdaıdy baqylaý úshin álbette kóp adam kerek. Aqsha aınalymy 256 mlrd teńge, taýar tizimi 180-ge jetken kezde kompanııadaǵy 100 adamǵa máseleni baqylaý áste ońaı emes. Mine sol sebepti elektrondy farmatsevtıkalyq aqparattyq júıeni iske qosqan bolatynbyz. Ónimderdiń 60 paıyzy tsıfrlandyryldy. Karantın rejımi bizge áser etken joq. Sebebi qujat aınalymdarynyń bári de elektrondy túrde júrgiziledi. Qyzmetkerler úıinde jumys isteı beredi. Jetkizýshiden dárini alǵan kezde ol preparattyń serııasy, standartty markasy bolady. Osy serııalardyń kómegimen dári-dármektiń qandaı serııasynyń qoımamyzǵa túskenin, qandaı serııanyń aımaqtarǵa jóneltilgenin, medıtsınalyq uıymǵa qaısysynyń berilgenin kórip otyramyz. Búkil protsesti baqylaýda ustaımyz», - dedi «SK-Farmatsııa» basshysy.
Kompanııa basshysynyń aıtýyna qaraǵanda, qazir medıkamenttiń qaptamasynyń esepke tirkelýin qadaǵalaıtyn mehanızmdi iske qosý josparlanyp otyr.
«Serııa dári-dármektiń 100 qaptamasynan turýy múmkin. Biz qadaǵalaý mehanızmin iske qosýǵa qatysty, naqtyraq aıtqanda ár qaptama kimge berilgenin bilip otyrý úshin naqty sol qaptamalardy tirkeý máselesin kóterip otyrmyz. Máselen zaýyt 1 mln qaptama shyǵardy delik. Onyń 100 myńy Qazaqstanǵa jetýi múmkin. Ár qaptamanyń óz nómiri bar. Málimetterdiń bárin júıege engizemiz de, júıe arqyly preparat qaptamasy kimge berilgenin kórip otyramyz. Eger aldaǵy ýaqytta dári ekinshi márte satylyp ketse taýardyń qaı patsıentke berilgenin de bile alamyz. Bul óte tıimdi bolady», - dedi Berik Shárip.
Berik Shárip sonymen qatar 2018 jyly elektrondy satyp alý mehanızmi iske qosylǵanyn eske saldy.
«Basshy retinde jumysty ashyq júrgizý kerek dep esepteımin. 2018 jyldyń mamyrynda elektrondy portaldyń jumysyn jolǵa qoıdyq. Satyp alýdyń bári osy portal arqyly júrgizilgen edi. Múddelerdiń tartysy kqp. Sebebi jetkizýshiler baǵany ósirip jetkizgisi keledi. Bizdiń mindet – arzan baǵaǵa satyp alý. Osyny eskere otyryp, jetkizýshiler básekelese alatyndaı aqparattyń alań jasadyq. Bul amal tıimdiligin kórsetti. 2018 jyly 26,5 mlrd teńgeni, 2019 jyly 22,1 mlrd teńgeni únemdep qaldyq. 25 kompanııamen tikeleı seriktese jumys isteımiz. Aýktsıondy bastaǵan kezde bes-alty kompanııanyń arasynda báseke qyzý bolǵandyqtan baǵa edáýir tómendeıdi. Osyndaı tártippen 115 operatsııa júrgizdik», - dedi Berik Shárip.