Qazaqstanda serb kapıtaly quıylǵan 40-tan astam kompanııa jumys isteıdi

ASTANA. KAZINFORM — Qazaqstan-Serbııa arasyndaǵy ekonomıkalyq baılanys pen saýda aınalymy jyldan-jylǵa artyp keledi. Bul jóninde «Atameken» QR UKP Basqarma múshesi — Basqarma tóraǵasynyń orynbasary Nursultan Shoqanov málimdedi.

Ol qos memlekettiń ekonomıka, transportatsııa, aýyl sharýashylyǵy, logıstıka, farmatsevtıka, IT, qurylys salalaryndaǵy ortaq bastamalary odan ári tereńdep, damı túsetinine senim bildirdi. Ásirese, Serbııanyń tamaq ónerkásibindegi tájirıbesin zertteýge Qazaqstannyń qyzyǵýshylyǵy zor ekenin atap ótti.

— Serbııada aýyl sharýashylyǵyna qajetti zamanaýı tehnıkalar bar. Biz Serbııa tájirıbesin jetik meńgerip jatyrmyz. Qazaqstandyq kompanııa «Býdan» JShS men Serbııanyń «Zemýn Pole» ǵylymı-zertteý ınstıtýty 30 jyldan astam ýaqyttan beri birlesip atqaryp kele jatqan joba bar. Olar júgeriniń gıbrıdti tuqymyn óndiredi, — dedi N. Shoqanov.

Sonymen birge, Qazaqstannyń tsıfrlandyrý salasyndaǵy jetistikterine toqtaldy.

— Elektrondy Úkimettiń damýy boıynsha Qazaqstan BUU-nyń 2024 jylǵy esebinde 24-shi orynda tur. Serb sarapshylarynyń pikirinshe, Qazaqstannyń tsıfrlandyrýdy damytýǵa arnalǵan zańnamasy qundy jáne ony tájirıbe almasýda qoldanýǵa bolady. Bul baǵytta tájirıbe almasýǵa ekijaqty qyzyǵýshylyq zor. Oǵan búgingi jıynǵa aldyńǵy qatarly IT kompanııalar ókilderiniń jınalǵany aıǵaq, — dedi ol.

Budan bólek N. Shoqanov Qazaqstan Orta Azııadaǵy ınvestıtsııa quıýǵa eń qolaıly memleketterdiń biri ekenin aıtty. Onyń sózinshe, buǵan elimizdiń baı tabıǵı resýrstary, geografııalyq tıimdi ornalasýy jáne ınvestorlarǵa qolaıly jaǵdaı jasaýy sebep. Sondaı-aq «Atameken» QR Ulttyq kásipkerler palatasy otandyq jáne sheteldik kásipkerlerdiń zańdy múddesin qorǵaıdy.

Aıta keteıik, buǵan deıin bıyl Qazaqstan-Serbııa dıplomatııalyq qatynasyna 30 jyl tolatynyn jazǵanbyz.