Qazaqstanda sel men jer silkinisi qaýpin boljaıtyn stantsııalar tozǵan

ASTANA. QazAqparat – Qazaqstanda seısmıkalyq qaýipti sapaly boljaý úshin el boıynsha 285 seısmostantsııa men 11 bıostatsıonar qajet. Bul másele Ashyq NQA portalynda jarııalanǵan Qazaqstanda seısmologııa salasyn damytýdyń 2024-2028 jyldarǵa arnalǵan keshendi josparynda kóterilgen, dep habarlaıdy QazAqparat tilshisi.

«Qazir seısmıkalyq aýdandarda jumys istep turǵan stantsııalar men bıostatsıonarlardyń sany az. Tıisinshe, ol baǵalaý jáne táýekeldi anyqtaý boıynsha qoıylǵan mindertterdi oryndaýǵa múmkindik bermeıdi. Máselen, seısmıkalyq baqylaýdy «STÁE» JShS-niń 69 seısmologııalyq stantsııasy júrgizedi. Onyń altaýy isten shyqqan. Búginde stantsııalar Almaty, Shymkent qalalary men 12 oblystyń aýmaǵynda bar», - degen derekter keltirilgen keshendi josparda.

Búginde Almaty qalasynan basqa seısmıkalyq belsendi aımaqtarda ornalasqan iri shaharlarda qaýipti anyqtaıtyn birde-bir zamanaýı qurylǵy joq.

«Mamandardyń esebine sáıkes, seısmıkalyq qaýipti sapaly boljaý jáne onyń aldyn alý úshin respýblıkanyń búkil aýmaǵynda qosymsha 285 seısmostantsııa men 11 bıostatsıonar qoıý qajet», - dep máseleni sheshýge baǵyttalǵan usynys jazylǵan qujatta.