Qazaqstanda sekseýildi kesýge salynǵan tyıym merzimi uzartylady

ASTANA. QazAqparat - Qazaqstanda 2018 jyldyń sońyna qaraı sekseýildi shabýǵa taǵy da bes jyl merzimge tyıym salynbaq. Bul týraly QR AShM Orman sharýashylyǵy jáne janýarlar dúnıesi komıteti tóraǵasynyń orynbasary Qaırat Ústemirov OKQ-da ótken baspasóz máslıhaty barysynda málim etti, dep habarlaıdy «QazAqparat» HAA tilshisi.

«Bıylǵy jyldyń shilde aıynda bekitilgen zań boıynsha biz sekseýildi shabý men satýǵa tyıym saldyq. Demek, 2018 jylǵa deıin biz sekseýilden otyn daıyndaýdy shektedik. Alaıda saýda núktelerinde sekseýildi satý jalǵasa berdi. Osy sebepti saýda núktelerinde sekseýildi satýǵa tyıym saldyq. Osy tyıym aıasynda bizdiń aýmaqtyq ınkpetsııa turaqty túrde tekserý jumystaryn júrgizedi», - deıdi Qaırat Ústemirov.

Degenmen, buryn sekseýildi otyn retinde paıdalanýǵa úırenip qalǵan halyqtyń máselesi taǵy bar. Buny sheshý úshin tórt oblystyń belgili bir aýmaǵynda jergilikti turǵyndarǵa ǵana sekseýildi shabýǵa ruqsat etiledi eken.

«Osy maqsatta jergilikti turǵyndarǵa sekseýildiń shabýǵa bolatyn lımıti (1 úıge - 4 sharshy/metr) men orynyn belgiledik. Máselen, Almaty oblysynda 824 myń  sharshy metr, Jambyl oblysynda 27 myń  sharshy metr, Qyzylorda oblysynda 10 myń  sharshy metr, OQO 800 sharshy metr jerden jergilikti turǵyndarǵa ǵana sekseýildi shabýǵa ruqsat etildi. Basqa aýmaqta sekseýildi shabýǵa ruqsat joq. Shabýǵa da, satýǵa da, tasymaldaýǵa da tyıym salynǵan», - deıdi ol.

Komıtet tóraǵasynyń orynbasaryna aldaǵy ýaqytta moratorıı sozylýy múmkin be degen suraqqa qoıyldy.

«2018 jyldyń sońyna qaraı sekseýildi shabýǵa tyıym salatyn moratorııdi taǵy 5 jylǵa uzartýdy usynǵaly otyrmyz», - deıdi Qaırat Ústemirov.