Qazaqstanda segizinshi saıası partııa paıda bolýy múmkin

2026 jylǵy 15 sáýir kúni bastamashyl top jańa «Ádilet» saıası partııasyn qurý nıeti týraly resmı málimdeme jasady. Jańa partııa ózin progressıvti reformalardyń jaqtaýshysy, Ádiletti Qazaqstandy qurý, zań ústemdigin nyǵaıtý jáne sheshim qabyldaý protsesine azamattardyń keńinen qatysýyn qamtamasyz etýdi qoldaýshy retinde tanytady.

«Ádilet» partııasynyń negizgi maqsaty men mindetteri — Jańa Konstıtýtsııa qaǵıdattary men Ádiletti Qazaqstan qundylyqtary negizinde Qazaqstan Respýblıkasy azamattarynyń quqyqtaryn, bostandyqtary men múddelerin qorǵaý.

Jańa uıymnyń mıssııasy — 2026 jylǵy 15 naýryzda ótken referendýmda qabyldanǵan jańa Konstıtýtsııa erejeleriniń qatań saqtalýyn qamtamasyz etý. Jańa partııa progressıvti jastardy, túrli sala mamandaryn, qala men aýyl turǵyndaryn, ıaǵnı otandastarymyzdyń múddelerin shynaıy qorǵaýǵa jáne barshaǵa ortaq ádildikti ornatýǵa atsalysýǵa daıyn qazaqstandyqtardyń basyn biriktiredi.

— Biz ekonomıkasy qýatty, barshaǵakeń múmkindik beretin jáne álemdik qoǵamdastyqta abyroıly da bedeldi, Ádiletti memleketqurý jáne ony nyǵaıtýǵa múddeli barlyqazamattardyń kúsh-jigerin biriktirgimiz keledi, — dep málimdedi bastamashylar.

Ádildik, patrıotızm, eńbekqorlyq, jaýapkershilik jáne progress qundylyqtaryna súıene otyryp, partııa bastamashylary mynadaı basymdyqtardy jarııalady:

• Barlyq qazaqstandyq úshin múmkindikter teńdigin qamtamasyz etý, klandyq, óńirlik erekshelikterdiń yqpalyn azaıtý;
• Táýelsiz, tıimdi ári obektıvti quqyq qorǵaý jáne sot júıesin nyǵaıtý;
• Ekonomıkalyq ádildik pen Qazaqstannyń turaqty damýy.

Jańa partııa óziniń saıası kún tártibin qalyptastyrý aıasynda azamattyq qoǵam ókilderi, sarapshylar jáne sala mamandarymen tyǵyz yqpaldasýǵa nıetti.

16 sáýirde bastamashy top Qazaqstan Respýblıkasynyń Ádilet mınıstrligine tirkeýge daıyndyq rásimin bastaý týraly ótinish jiberedi jáne jaqyn arada partııanyń quryltaı sezin ótkizýdi josparlady.

Málimdemege qol qoıǵan bastamashyl top músheleriniń tizimi:

• Atabaeva Gúlzıra Nurjanqyzy
• Bektýrov Renat Nurmoldauly
• Jamanqulova Qarlyǵash Qalıbekqyzy
• Zákıeva Dınara Bolatqyzy
•  Kenjehanuly Raýan
• Kýzıeva Zamıra Zakırjanqyzy
• Qarabasova Laýra Shapaıqyzy
• Qusaıynov Aıǵazy Ámirlanuly
• Lavrentev Andreı Sergeevıch
• Matjanı Nurbek Seıilhanuly
• Nurmuhamedov Bórihan Jolbarysuly
• Súgirbaı Aıat Isataıuly
• Taýan Muhamedqalı Edýarduly
• Ten Irına Sergeevna
• Shıbýtov Marat Maksumuly
• Shyńǵysbaeva Lázzat Altynbekqyzy

Osyǵan deıin Ádilet mınıstri jańa partııalardy tirkeýge qatysty pikir bildirgen edi.