Qazaqstanda saıt qurastyrý jónindegi birinshi chempıonat ótedi
ALMATY. 8 qyrkúıek. QazAqparat /Názıra Eleýhan/ - Almatyda 13 qyrkúıek kúni Saıt qurastyrý jónindegi birinshi chempıonat ótedi. Atalmysh chempıonattyń bas seriktesi - «KaR-Tel» JShS (Beeline SB) boldy. Bul týraly atalmysh kompanııanyń baspasóz qyzmeti habarlady.
Esterińizge sala ketsek, chempıonattyń maqsaty - myqty saıt qurastyrýshylardy anyqtaý bolyp tabylady. Chempıonat barysynda «Avtorlyq quqyq. Qazaqstandaǵy Creative Commons erikti lıtsenzııasyn tanytý» taqyrybynda dóńgelek ústelder jáne «JOO, memlekettik mekemelerde jáne mektepterde Erikti baǵdarlamalayq qamtamasyz etý» taqyrybynda dárister ótetin bolady.
«Ǵalamtor-tehnologııasy qarqyndy jyldamdyqpen damyp keledi jáne osyndaı damýdyń alǵashqy sheginde turǵan kóp salaly operator esebinde biz mundaı sharalardyń ótýine qyzyǵýshylyq tanytamyz. Biz bul chempıonattyń birinshiden, jas mamandardyń damýyna yqpal etetinine jáne bul alańnyń tek qana qatysýshylarǵa ǵana emes, sondaı-aq kompanııanyń da tájirıbe almasý alańyna aınalady degen senimimiz mol», - deıdi «2DayTelecom» kompanııasynyń Bas dırektory Vıktor Grıban.
Jarys jeńimpazdary chempıonat barysynda Bas seriktes bolyp tabylǵan - Beeline-nan qazirgi zamanaýı noýtbýk, netbýk jáne elektrondy kitaptardy syıǵa alatyn bolady.
