Qazaqstanda saılaýǵa túsken saıası partııalarǵa teńdeı jaǵdaılar jasalǵan - reseılik baıqaýshy
ASTANA. QazAqparat - Qazaqstanda saılaýǵa túsken saıası partııalarǵa teńdeı jaǵdaılar jasalǵan. Bul týraly búgin QR Parlamenti Májilisin saılaý barysyn baqylaýǵa kelgen sheteldik delegattardyń baspasóz máslıxatynda Máskeýdegi Halyqaralyq ýnıversıtettiń Halyqaralyq yqpaldastyq ınstıtýtynyń dırektory Igor Fılkevıch málim etti.
«Eń aldymen Qazaqstan xalqyn Naýryz meıramymen quttyqtaǵym keledi. Kóktemgi jańarý kezinde Qazaqstan Parlamentiniń jańartylý protsesiniń oryn alýy óte keremet dep sanaımyn. Saılaý shyn máninde merekelik kóńil kúımen ótýde», - dep atap ótti ol.
I. Fılkevıchtiń sózi boıynsha, Qazaqstanda saılaýǵa túsken saıası partııalarǵa teńdeı jaǵdaılar jasalǵan.
«Memlekettik organdar nemese ózge uıymdardan eshbir qysym jasalyp jatqan joq, saıası partııalar birdeı múmkindikterge ıe. Saılaýǵa qatysyp jatqan taraptardan shaǵymdar kelip túsken joq. Baıqaýymyzsha, saılaýǵa xalyqtyń barlyq taptary qatysýda. Qazirgi ýaqytta 25 paıyz xalyq daýys bergenin eskersek, saılaý sátti ótýde dep aıtýǵa bolady», - dedi baıqaýshy.
Aıta keteıik, QR Parlamenti Májilisiniń depýtattaryn saılaý barysyn baqylaýǵa 817 xalyqaralyq baıqaýshy men 147 sheteldik BAQ ókilderi kelip otyr.
