Qazaqstanda saılaýǵa azamattardyń qatysýyn mindetteý qarastyrylyp jatyr ma
ASTANA.KAZINFORM – Qazaqstanda saılaý men referendýmdarda azamattardyń qatysýyn mindetteý qarastyrylyp jatqan joq. Bul týraly QR Ortalyq saılaý komıssııasynyń hatshysy Shavhat Ótemisov málim etti.
Onyń aıtýynsha, «Qazaqstan Respýblıkasyndaǵy saılaý týraly» Konstıtýtsııalyq zańyna ózgerister men tolyqtyrýlar engizý týraly» Konstıtýtsııalyq zań jobasynda qazaqstandyqtardyń daýys berýin talap etetin norma jazylmaǵan. Sonymen qatar, Ortalyq saılaý komıssııasy da mundaı ózgeristerge bastamashylyq jasaýdy josparlap otyrǵan joq.
Sh. Ótemisovtiń aıtýynsha, Qazaqstanda saılaý kezinde jastardyń belsendiliginiń tómendeýi problemasy bar.
Sonymen qatar OSK hatshysy saılaý naýqanynda daýys berýshilerdiń kóptep tartylýyna ne áser etetinin atap ótti.
— Quryltaıǵa qatysty saılaýdy aıtatyn bolsaq, bul rette saıası partııalar erekshe nazarda bolady. Olar saılaý naýqanyn qanshalyqty belsendi ótkizse, saılaý kúni daýys berýshilerdiń kelýi sonshalyqty artýy múmkin, - dedi ol.
Budan buryn habarlanǵandaı, búgin Parlament palatalarynyń birlesken otyrysynda «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» Konstıtýtsııalyq zań jobasy birinshi oqylymda maquldandy.
Munymen qosa, Parlament palatalarynyń birlesken otyrysynda «Qazaqstan Respýblıkasynyń Quryltaıy jáne onyń depýtattarynyń mártebesi týraly» konstıtýtsııalyq zań jobasy birinshi oqylymda maquldandy.
