Qazaqstanda saılaý júıesiniń proportsıonaldy-majorıtarlyq modeli engiziledi

NUR-SULTAN. QazAqparat – Saılaý júıesiniń proportsıonaldy-majorıtarlyq modeli engiziledi. Bul týraly búgin Úkimet otyrysynda QR Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

Onyń aıtýynsha, Memleket basshysynyń Joldaýyn iske asyrý jónindegi jalpyulttyq is-sharalar josparynyń «Saılaý júıesin jetildirý» baǵyty boıynsha 1 is-shara iske asyrylatyn bolady.

«Eldi odan ári saıası jańǵyrtý maqsatynda saılaý júıesiniń proportsıonaldy-majorıtarlyq modeli engiziletin bolady. Ol 70/30 qatynasynda Májilis qurýdyń aralas júıesin kózdeıdi. ıAǵnı depýtattardyń 70 paıyzy partııalyq tizimder boıynsha, 30 paıyzy majorıtarlyq júıe boıynsha saılanatyn bolady. Sondaı-aq oblystardyń, respýblıkalyq mańyzy bar qalalardyń jáne astananyń máslıhattaryna – majorıtarlyq júıe boıynsha 50, partııalyq tizimder boıynsha 50 paıyz, aýdandar men qalalardyń máslıhattaryna – majorıtarlyq júıe boıynsha saılanady», - dedi Álibek Qýantyrov.