Qazaqstanda saılaý jáshikteriniń móldirligi meni qaıran qaldyrdy - vengrııalyq baıqaýshy
ALMATY. QazAqparat - Qazaqstanda saılaý jáshikteriniń móldirligi meni qaıran qaldyrdy. Bul týraly Almatyda QR Parlamenti Májilisi men barlyq deńgeıdegi máslıhattar depýtattarynyń saılaýyna qatysty ótken baspasóz máslıhaty barysynda halyqaralyq táýelsiz baıqaýshy, Vengrııa Parlamenti tóraǵasynyń orynbasary, «Eń jaqsy Vengrııa úshin» partııasynyń múshesi, Qazaqstan-Vengrııa Parlamenttik dostyq tobynyń vıtse-prezıdenti Tamash Shneıder málim etti.
Onyń aıtýynsha, Vengrııada saılaý naýqandary barysynda móldir jáshikter qoldanylmaıdy eken.
«Jalpy, Qazaqstandaǵy saılaý naýqandary Vengrııadaǵy saılaý naýqandaryna uqsas keledi eken. Biraq, Qazaqstanda saılaý jáshikteriniń móldirligi meni qaıran qaldyrdy. Bizde ondaı jáshikter qoldanylmady. Bul biz úshin jaqsy úlgi boldy. Bizdiń partııa áleýeti jóninen Vengrııadaǵy ekinshi partııa bolyp sanalady. Sondyqtan, Memlekettik jınalystyń, ıaǵnı Parlament depýtattarynyń kezekti otyrysynda eldegi saılaý naýqandarynda móldir jáshikterdi paıdalaný jóninde bastama kóteretin bolamyz. Shynynda da móldir jáshikter daýys berýdiń ádil ótýine septigin tıgizedi», - dedi T. Shneıder.
Sonymen qatar, ol Almatyda uıymdastyrylǵan saılaý naýqany barysynda quqyq buzýshylyq áreketterdi baıqamaǵandyǵyn jetkizdi.
«Biz Almatyda saılaý kúni barlyǵy alty saılaý ýchaskesinde bolyp, daýys berý úderisine baqylaý jasadyq jáne saılaý ýchaskesi tóraǵalarymen sóılestik. Saılaýshylardyń kelý deńgeıi oıdaǵydaı dárejede boldy deýge bolady. Quqyq buzýshylyq áreketter tirkelgen joq», - dedi T. Shneıder.
