Qazaqstanda saılaý ótkizý týraly sheshim bir qadam alda bolýdy bildiredi - saıasattanýshy
«Prezıdenttiń sheshimi qoldaýǵa laıyq, sebebi ol kemel ári parasatty sheshim boldy. Daǵdarystyń jańa tolqyny kelmes buryn, biz Qazaqstannyń Parlamentin jańartyp alǵanymyz jáne daǵdarysqa qarsy reformalarymyzdy jańa kúshpen bastaǵanymyz jón bolady», - dedi Z.Shaýkenova QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda.
Fılosofııa jáne saıasattaný ınstıtýty dırektorynyń pikirinshe, Qazaqstannyń aldynda búgin jańa qaýip-qaterler tur. Degenmen bul kezeńge biz Ult Josparyn oryndaýdyń «100 naqty qadamy» aıasynda is-qımyldyń naqty josparlarymen aıaq basamyz.
«Osydan birneshe jyl buryn QR Prezıdenti Nursultan Nazarbaev eń qıyn onjyldyq keletinin eskertken edi. Biraq ol kezde munaı baǵasynyń eń joǵary deńgeıi bolǵan kez edi, barlyǵy qarqyndy damýdyń sharapatyn tatyp jatqan bolatyn. Biraq Elbasy oǵan maldanbaı, munaı qarajatyn qıyn kezeńderge dep Ulttyq qorǵa jınastyra bastady. Sonymen qatar Indýstrııalyq-ınnovatsııalyq damý baǵdarlamasyn qabyldap, ǵylymda, bilim berý salasynda, medıtsınada birqatar iri reformalardy bastap berdi. Búginde osynyń barlyǵy Ult Jospary aıasynda jańa aýqymda kórinis taýyp otyr», - deıdi saıasattanýshy.
Eske sala keteıik, 20 qańtarda QR Prezıdenti Nursultan Nazarbaev QR Parlamenti Májilisin taratý týraly Jarlyqqa qol qoıdy. QR Parlamenti Májilisiniń jáne barlyq deńgeılerdegi máslıhat depýtattaryn saılaý 20 naýryzda ótedi.
«Prezıdent Parlament saılaýyn ótkizý týraly Jarlyqqa qol qoıý arqyly Elbasy alǵa kezekti qadam jasaǵandyǵyn bárimiz de kórip otyrmyz. Osyndaı qadamdardy Qazaqstan óz táýelsizdiginde birneshe ret jasady. Sonyń ishinde kezekten tys elektoraldy naýqandardy da birneshe ret ótkizdi. Biz únemi bir qadam alda júretindikten ǵana elimiz osyndaı jetistikterge qol jetkizip otyr», - dep túıdi sózin Z.Shaýkenova.
