Qazaqstanda saılaý barysyn baqylaý jónindegi komıssııa óz jumysyn bastady

Oǵan elimizge tanymal saıasatkerler, sarapshylar, jýrnalıster men úkimettik emes uıym ókilderi kirip otyr.

"Qazirgi ýaqytta komıssııanyń basty maqsaty - saılaýdy shynaıy ótkizý. Mindetimiz - saılaýshylarmen sóılesip, olardy saıası naýqanǵa daıyndaý. Biz xalyqpen ǵana emes, shetelden kelgen baıqaýshylarmen, árbir partııa ókilderimen jumys isteıtin bolamyz. Bizdiń komıssııada elge belgili azamattar kirgen", - dep atap ótti komıssııa basshysy, Qazaqstannyń azamattyq alıansy uıymynyń jetekshisi Nurlan Erimbetov.

Onyń sózine qaraǵanda, komıssııaǵa 22 adam múshelik etedi.

"Biz Ortalyq saılaý komıssııasymen, Bas Prokýratýramen, xalyqaralyq baqylaýshylarmen jáne BAQ-pen tyǵyz jumys jasaımyz. Bizde arnaıy veb-saıt qurylǵan. Onda saılaýshylar zańnamadaǵy ózgerister týraly, saılaýdyń ótý tártibi jóninde aqparat ala alady. Sonymen qatar kez kelgen ýaqytta saılaýda oryn alǵan buzýshylyqtar týrasynda xabar berýine bolady. El boıynsha shamamen 11 myńnan astam baıqaýshy saılaý barysyn qadaǵalap otyrmaq. Biz barlyq saılaý ýchaskelerin qamtıtyn bolamyz", - dedi N. Erimbetov.

Komıssııa tóraǵasy atap ótkenindeı, shtab táýlik boıy jumys jasaıdy. Baqylaýshylarǵa olardyń quqyqtary men mindetteri týraly jazylǵan arnaıy oqý quraldary taratylady.

"Biz belgili bir óńirlerde oryn alǵan barlyq zań buzýshylyqtar jaıynda xalyqty xabarlandyryp turamyz. Ony talqyǵa salamyz, osy salada basqaryp otyrǵan tulǵalarǵa jetkizemiz", - dep túıdi sózin N. Erimbetov.