Qazaqstanda saılaý ashyq jáne básekelestik negizde ótkizildi - Omer Kojaman
ALMATY. QazAqparat - Qazaqstanda Parlament Májilisi depýtattaryn merziminen buryn saılaý naýqany ashyq jáne básekelestik negizde ótkizildi. Bul týraly búgin Almatyda QR Parlamenti Májilisi men ár túrli deńgeıdegi máslıhattar depýtattarynyń saılaýyna qatysty ótken baspasóz máslıhaty barysynda halyqaralyq baqylaýshy, Túrik Keńesi Bas hatshysynyń orynbasary, Túrkııa eliniń azamaty Omer Kojaman málim etti.
«Túrki tildes memleketterdiń yntymaqtastyq jónindegi keńesiniń baqylaýshylar mıssııasy óz qyzmetin Qazaqstan Respýblıkasynyń zańnamasyna jáne saılaýǵa halyqaralyq baqylaý júrgizý normalaryna saı júrgizdi.
Bizdiń baqylaýshylar saılaý naýqanyna baqylaýdy Almaty men Qyzylorda qalalarynda 17 naýryzda bastady. Saıası partııalar men aýmaqtyq saılaý komıssııalarynyń ókilderimen kezdesti. Olar baqylaýshylarǵa zań buzýshylyq áreketter týraly habarlaǵan joq», - dedi O. Kojaman.
Sonymen qatar, ol daýys berý rásiminiń ashyq túrde ulttyq jáne halyqaralyq baıqaýshylardyń qatysýymen júrgizilgendigin atap ótti.
«Bizdiń baıqaýshylar barlyǵy 61 saılaý ýchaskesinde baqylady. Olardyń ishinde 34-i Almatyda, al 27-si Qyzylorda qalasynda ornalasqan. Sondaı-aq, mısııa eki saılaý ýchaskesinde daýystardy sanaý sharasyna qatysty. Azamattar saılaýǵa belsendi túrde qatysty. Saılaýdyń barlyq rásimderi baqylaýshylar úshin qol jetimdi boldy. Qoryta kele aıtqanda, QR Parlamenti Májilisi depýtattaryn merziminen buryn saılaý naýqany ashyq jáne básekelestik negizde ótkizildi», - dedi O. Kojaman.
