Qazaqstanda saılaý aldynda debat uıymdastyrylýy múmkin be

NUR-SULTAN. QazAqparat - «Zańgerler - ádil saılaý úshin» RQB quramyna kiretin zań ǵylymdarynyń doktory Marat Sársembaev saılaý aldynda ashyq debat uıymdastyrý yqtımaldyǵyna qatysty pikir bildirdi, dep habarlaıdy QazAqparat tilshisi.

«Debat - óte qyzyqty ári saıası elektoraldy shara. Shetelderde, ásirese AQSh-ta debattyń qalaı uıymdastyrylatynyn kópshilik biletin bolar. Bizde ol sál basqasha uıymdastyrylady - uıymdastyrýshy retinde Ortalyq saılaý komıssııasy bar. Komıssııa kandıdattardy debatqa shaqyryp, barlyǵyna da sóz sóıleý kezegin beredi», - dedi Marat Sársembaev tilshilermen kezdesýde.

Sonymen qatar, zańger zańnamada jazylǵandaı, OSK belgili bir adamǵa basymdyq bere almaıtynyn, bárine teń qaraıtynyn atap ótti.

«Qandaı da bir basqa uıymdar debatty uıymdastyra alady» degen zańda jazylmaǵan. Ony qazirgi tańda tek OSK ótkize alady. Degenmen, qazaqstandyq zańdardyń birde-birinde protseske qatysýshylar, basqa saıası partııalar debat ótkize almaıdy degen qatań tyıym da joq», - deıdi Marat Sársembaev.

Aıta ketsek, búgin Nur-Sultanda «Zańgerler - ádil saılaý úshin» RQB músheleri tilshilermen kezdesti. Jalpy, elimizde 3 myńǵa tarta zańger saılaýdyń ádil ótkizilýin baqylap otyr.