Quryltaı saılaýy aldyndaǵy «tynyshtyq kúni» bastaldy
ASTANA. KAZINFORM — Qazaqstanda Quryltaı depýtattaryn saılaý qarsańyndaǵy «tynyshtyq kúni» bastaldy.
Atap aıtqanda, saǵat 00:00–de referendým aldyndaǵy úgit jumystary kezeńi aıaqtalyp, 22 tamyzda resmı túrde «tynyshtyq kúni» tártibi kúshine endi. Osy ýaqyttan bastap jáne daýys berý kúni de — 23 tamyzda kez kelgen úgit-nasıhat júrgizýge tyıym salynady (Qazaqstan Respýblıkasyndaǵy saılaý týraly» Zańnyń 32-baby).
— Bul rette saılaý komıssııalarynyń úı-jaılarynan jáne daýys berýge arnalǵan úı-jaılardan tys jerlerde burynnan ilýli turǵan baspa úgit materıaldaryn sol oryndarynda qaldyrýǵa bolady. Internet jelisinde buryn ornalastyrylǵan úgit materıaldaryn burynǵy oryndarynda qaldyrýǵa bolady. Buryn ornalastyrylǵan materıaldardy ınternet-resýrstardyń basty betterine shyǵarýǵa jol berilmeıdi, — dep atalyp ótken zań normasynda.
Máselen, tynyshtyq kúni men saılaý kúninde áleýmettik jelidegi reposttar úgit-nasıhat retinde sanalýy múmkin. Bul rette osyndaı zańsyz áreketke jol bergen jeke jáne zańdy tulǵalar, onyń ishinde áleýmettik jeli qoldanýshylary jaýapqa tartylady. Óz kezeginde, buryn ınternet-resýrstarda ornalastyrylǵan úgit-nasıhat materıaldary, saıttyń basty betine shyǵarylmaı, burynǵy oryndarynda saqtalýy qajet. Sondaı-aq, saılaý kúni ótkizý talaptary, daýys berý tártibi jáne basqalary týraly túsindirme sıpattaǵy buryn ornalastyrylǵan aqparattyq materıaldar, jarnamalyq bannerlerdi qosa alǵanda, burynǵy oryndarynda qalýy qajet.
«Ákimshilik quqyq buzýshylyq týraly» Kodeksiniń 102-babynda zań talaptaryn buzǵandarǵa tıisti jaza qarastyrylǵan.
Bul turǵyda belgilengen aıyppul somasy:
- jeke tulǵalarǵa – 15 AEK;
- shaǵyn kásipkerlik sýbektilerine nemese kommertsııalyq emes uıymdarǵa – 20 AEK;
- orta kásipkerlik sýbektilerine – 25 AEK;
- iri kásipkerlik sýbektilerine - 35 AEK.
Aıta keteıik, jaqynda Ortalyq saılaý komıssııasynyń múshesi Azamat Aımanaqumov QR Quryltaıynyń depýtattaryn saılaýda daýys berý tártibin aıtyp berdi.
Daýys berý 10423 saılaý ýchaskesinde ótedi. Onyń ishinde 61 shet memleketterdegi Qazaqstan Respýblıkasynyń ókilettikteri janynda qurylǵan 79 saılaý ýchaskesi bar.
Saılaýshylardyń tirkelgen orny boıynsha qurylǵan saılaý ýchaskelerinde daýys berý tańǵy 07:00–den keshki 20:00–ge deıin júrgiziledi.
