Qazaqstanda saıası reformalardyń tabıǵaty da ózgerip kele jatyr — sarapshy
ASTANA. KAZINFORM — Qazaqstan Halyq keńesiniń qurylýymen jáne aldaǵy máslıhat saılaýymen elimizdiń saıası júıesin qaıta jańǵyrtýǵa baǵyttalǵan úlken reformalar tsıkli óziniń mańyzdy bir kezeńin aıaqtap keledi. Bul týraly «Qazaqstandyq qoǵamdyq damý ınstıtýty» KeAQ Otbasylyq saıasat bóliminiń basshysy Aqnur Imanqul pikir bildirdi.
Onyń aıtýynsha, bul bir kúnde kelgen ózgeris emes. «Halyq únine qulaq asatyn memleket» tujyrymdamasynan bastalǵan baǵyt birtindep saılaý júıesiniń ózgerýine, jańa Konstıtýtsııanyń qabyldanýyna, Quryltaı men Vıtse-prezıdent ınstıtýtynyń qurylýyna, Qazaqstan Halyq keńesiniń qalyptasýyna ulasty. Munyń barlyǵy saıası júıeni jańa logıkaǵa kóshirýge baǵyttalǵan sabaqtas protsess.
Sarapshynyń aıtýynsha, áleýmettanýshy retinde ony Qazaqstan Halyq keńesiniń tek ınstıtýtsıonaldyq mártebesi ǵana emes, onyń quramy da qyzyqtyrady.
— Keńes 126 músheden turady jáne onyń quramyna etnomádenı birlestikterdiń, azamattyq qoǵam uıymdarynyń, máslıhattar men qoǵamdyq keńesterdiń ókilderi engizilgen. Per Býrdeniń tilimen aıtsaq, mundaı keńistikte tek saıası kapıtal ǵana emes, áleýmettik, mádenı jáne sımvoldyq kapıtaldyń úılesýi mańyzdy adamnyń qoǵamdaǵy baılanystary, kásibı bilimi, jınaǵan bedeli jáne oǵan degen senim jańa ınstıtýttyń yqpalyna áser etedi. Sondyqtan Qazaqstan Halyq keńesi úshin eń mańyzdy másele tanymal nemese tájirıbeli adamdardyń bir jerde jınalýy ǵana emes, sol ártúrli kapıtaldy qoǵamnyń naqty suranysyn memlekettik sheshimder deńgeıine jetkizetin resýrsqa aınaldyra alý, — dep túsindirdi maman.
Sonymen qatar spıkerdiń pikirinshe, ókildik máselesinde formaldy jáne mazmundy ókildik bir uǵym emes. Atap aıtqanda, belgili bir toptyń ókili Keńeste otyrǵany sol toptyń daýysy avtomatty túrde estildi degendi bildirmeıdi. Naqty tıimdilik múshelerdiń óz áleýmettik ortasymen keri baılanys ornata alýyna, qoǵamdyq máseleni durys artıkýlıatsııalaýyna baılanysty bolady. Jańa ınstıtýttyń kúshi onyń formaldy mártebesinde ǵana emes, qoǵam men memleket arasynda naqty baılanys qura alýynda.
Sarapshynyń aıtýynsha, aldaǵy máslıhat saılaýy osy reformalardyń jergilikti deńgeıdegi mańyzdy kezeńine aınalady.
— Qoǵam memleketti, eń aldymen, ortalyq bıliktiń qurylymy arqyly emes, óziniń kúndelikti ómirindegi máseleler arqyly sezinedi. Máselen, jol, mektep, emhana, turǵyn úı, jumys, áleýmettik kómek, ınfraqurylym, qaýipsizdik máseleleriniń sheshilýi. Sondyqtan saıası reformalardyń naqty nátıjesi óńirlerde sezilmese, ortalyq deńgeıdegi ınstıtýtsıonaldyq ózgeristerdiń qoǵamdyq áseri de shekteýli bolýy múmkin. Osy turǵydan alǵanda, máslıhattar formaldy ókildi organnan qoǵam men jergilikti atqarýshy bılik arasyndaǵy naqty baılanys ınstıtýtyna aınalýy tıis, — dep atap ótti ol.
Sarapshy eldegi saıası reformalardyń tabıǵaty da ózgerip kele jatqanyn jetkizdi.
— Buǵan deıin negizgi másele «qandaı jańa ınstıtýttar qurylady?» degen suraq bolsa, endigi kezeńde «sol ınstıtýttar qalaı jumys isteıdi?» degen suraq aldyńǵy orynǵa shyǵady. Instıtýtty zańmen qurýǵa bolady, biraq oǵan qoǵamnyń senimin zańmen bekitý múmkin emes. Ókilettikti Konstıtýtsııamen belgileýge bolady, biraq kásibılik, bedel, keri baılanys pen qoǵamdyq senim kúndelikti jumys barysynda qalyptasady, — dedi Aqnur Imanqul.
Qorytyndylaı kele, sarapshy birneshe jyl ishinde jańa saıası arhıtektýra qalyptasqanyn, endigi mindet sol arhıtektýrany qoǵamǵa naqty nátıje beretin júıege aınaldyrý ekenin atap ótti.
Buǵan deıin Prezıdent Halyq keńesi múshelerine máseleni kótere otyryp, sheshimin de usyný qajet ekenin aıtqan edi.
