Qazaqstanda saıası memqyzmetkerlerdiń sany 6,5 ese qysqarady - B.Baıbek
ASTANA. 2 qarasha. QazAqparat - Qazaqstanda saıası memlekettik qyzmetkerlerdiń sany 3277-den 538 adamǵa deıin, ıaǵnı 6,5 esege qysqartylady.
Bul týraly búgin Astanada «Memlekettik organdar qyzmetiniń tıimdiligin baǵalaý» atty II halyqaralyq konferentsııa barysynda QR Prezıdenti Ákimshiligi Basshysynyń orynbasary Baýyrjan Baıbek málim etti.
«Dál sol aldyńǵy qatarly qyzmetkerler arqyly eldiń tıimdi saıasaty júrgiziletin bolady. Eń negizgi de tutqaly oryndar, ıaǵnı «A korpýsyndaǵy» asa joǵary kásibı 500 menedjer Konstıtýtsııanyń naqty talaptaryn ustana otyryp, eseli reformalardyń oryndaýshylaryna aınalady», - dedi B.Baıbek.
Onyń aıtýynsha, osyǵan oraı olardyń kásibıligine úlken talaptar qoıylatyn bolady.
«Saıası taǵaıyndalǵandar elimizdiń memlekettik qyzmetinde óte az bolady. «A korpýsy» betke ustar, eń tańdaýly basqarýshy top ókilderi retinde qatań irikteýden ótkizilip turady. QR Prezıdenti janynan ulttyq komıssııa qurylady. Oǵan engen QR Prezıdentiniń Ákimshiligi Basshysy, onyń orynbasary, QR Premer-Mınıstri, QR Parlamenti Májilisi men Senatynyń vıtse-spıkerleri eldiń kadrlyq rezervin jasaqtaýǵa quzyrlyq etedi. Ol rezervten «A korpýsyna» laıyqty qyzmetkerler tańdalady», - dep atap ótti ol.
«A korpýsyna» - joǵary ákimshilik tulǵalar, memlekettik organdardyń jaýapty hatshylary, komıtet basshylary, qala jáne aýdan ákimderi ense, saıası tulǵalarǵa - joǵary býyndaǵy basshylar, mınıstr, vıtse-mınıstr, oblys deńgeıindegi ákimder men ákim orynbasarlary, oblys ortalyǵynyń ákimi jatady.
«A korpýsy» bul - apparat basshylyǵy. Olardyń jalaqylary jeke sektordaǵy jalaqy deńgeıine deıin joǵarylatylady. Tıisinshe bonýstyq júıe bolady. QR Úkimetinde bul másele qaralyp jatyr. «A korpýsyndaǵy» saıası qyzmetke tek QR Prezıdentiniń sheshimimen ǵana taǵaıyndalady. Eger búgin mınıstr ornynan ketse, keleside ol «A korpýsyna» tek baıqaý negizinde ǵana qaıta ene alady. Osyǵan oraı mansaptyq josparlaý jasalyp turmaq. Eger ol jemqorlyqqa qatysy bar bolyp shyqsa, keıin ol bul korpýsqa qaıtyp kire almaıdy», - dep túıindedi sózin B.Baıbek.
