Qazaqstanda saıası qýǵyn-súrgin qurbandary tegin baspana alýǵa quqyly bolady
ASTANA. QazAqparat - Qazaqstanda saıası repressııa qurbandary memlekettik turǵyn úı qorynan turǵyn úıdi tegin jekeshelendire alady. Búgin Parlament Senaty Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda Ulttyq ekonomıka vıtse-mınıstri Qaıyrbek Óskenbaev málim etti. Eske salaıyq, komıtet otyrysynda «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasy talqylanǵan bolatyn.
«Qoldanystaǵy zańnama normalary arasyndaǵy kollızııalardy joıý maqsatynda, saıası repressııa qurbandaryna baspanany tegin jekeshelendirý quqyǵyn usyný qarastyrylady», - dedi Q. Óskenbaev.
Budan bólek, vıtse-mınıstrdiń sózine qaraǵanda, keńes zamanynda úı alyp, ony jekeshelendirip alǵan azamattar Qazaqstan Respýblıkasynyń atynan úı aldy dep sanalmaıdy. «Alaıda, Keńes odaǵy tusynda adamdar 100 paıyz kýpondyq mehanızm boıynsha úı alǵan. 1993 jylǵa deıin,1996 jylǵa deıin berilgen kýpondardyń taǵdyry qaıta qaralmaıdy. Egemendi el bolǵannan keıin kýponmen alynǵan páterlerdi jekeshelendirildi dep sanamaımyz. Ol óz betimen qalady. Qazir bir adam memleketten bir ǵana úı jekeshelendirýge quqyly», - dedi Óskenbaev.
