Qazaqstanda saıası ıdeıalar men básekelestik jetispeıdi – Aıdos Sarym

ASTANA. KAZINFORM — Qazaqstanda saıası protsesterdiń sapasyn arttyrý úshin partııalar arasyndaǵy shynaıy báseke qajet. Bul týraly Májilis depýtaty Aıdos Sarym málimdedi.

– Qazaqstanda eki úlken másele bar. Ol – ıdeıanyń azdyǵy men básekelestiktiń joqtyǵy. Báseke men partııalyq ıdeologııalardyń ózara talasy – dástúrli ınstıtýttar. Jaqsy bolsyn, jaman bolsyn, budan artyq tıimdi mehanızmdi ázirge eshkim usynǵan joq, - deıdi májilismen «Jańa Konstıtýtsııa: senim men damýdyń arhıtektýrasy» sarapshylar alańynda sóılegen sózinde.

Spıker elimizde dál osy partııalar arasyndaǵy báseke aqsap turǵanyn jetkizdi.

– Mysal keltireıin. Bizdiń tarıhymyzda eshqashan, eshbir aımaqta belgili bir partııa kelip: «Máslıhat qalalyq bıýdjet qabyldap jatyr eken, biz oǵan balama nusqa jasadyq» nemese «Máslıhat mádenıet týraly baǵdarlama usyndy, biz onymen kelispeımiz, ol bylaı bolý kerek» dep naqty usynys jasaǵan emes. Al shyn máninde bizge keregi – ıdeıalardyń bir-birimen talasýy. Partııalar básekelesip, túrli máselelerge jol bermeýi kerek. Partııalardyń parlamenttik júıege yqpaly osydan bastalýy tıis, - deıdi ol.

Eske sala keteıik, buǵan deıin Májilistiń Halyqaralyq ister, qorǵanys jáne qaýipsizdik komıtetiniń tóraǵasy Aıgúl Quspan «Bir palataly Parlament – Quryltaı Qazaqstandaǵy partııalyq qurylymdy tıimdi etýge yqpal etedi» degen pikir bildirgen edi.