Qazaqstanda saıasatker bolǵysy keletin áıelderdiń sany ósip keledi
ASTANA. QazAqparat - Sońǵy úsh jylda memlekettik qyzmette áıel adamdardyń sany kóbeıip otyr, dep habarlaıdy QazAqparat tilshisi QR Memlekettik qyzmet jáne sybaılas jemqorlyqqa qarsy is-qımyl agenttiginiń baspasóz qyzmetine silteme jasap.
«Sońǵy úsh jylda memlekettik qyzmettegi áıel adamdardyń sany 54 paıyzdan 56 paıyzǵa deıin kóbeıdi. Sonymen birge saıası qyzmette jumys isteıtin áıelder sany 2015 jylda 1 paıyzǵa, al 2016 jyly 0,4 paıyzǵa ósti. Naqty sanmen keltirsek, 2014 jyly Qazaqstanda saıasatker áıelderdiń sany 34 adamdy qurasa, 2015 jyly - 39, al 2016 jyly atalǵan kórsetkish 43 adamǵa deıin jetti» - deıdi agenttiktiń memlekettik qyzmet departamenti monıtorıng jáne taldaý basqarmasynyń basshysy Nurgúl Jannazarova.
Jalpy, qazirgi ýaqytta memlekettik qyzmette 51 151 áıel adam jumys isteıdi. Bul barlyq memlekettik qyzmetshilerdiń 55,5 paıyzyn quraıdy. Osylaısha, memleketke qyzmet etip júrgen áıelderdiń sany 0,5 paıyzǵa kóbeıip otyr.
