Qazaqstanda saýsaq izin alýdyń jańa tártibi engizildi
ASTANA. KAZINFORM — 1 shildeden bastap daktıloskopııalyq jáne genomdyq tirkeýdi júrgizýdiń jańartylǵan qaǵıdalary kúshine endi. Ózgerister el azamattarynyń, sheteldikter men azamattyǵy joq adamdardyń saýsaq izderin alý jáne jeke basyn rastaý tártibine qatysty, dep habarlaıdy Kazinform tilshisi.
Tıisti ózgerister Іshki ister mınıstri mindetin atqarýshynyń buıryǵymen engizildi.
Jańa qaǵıdalarǵa sáıkes, kóshi-qon qyzmeti bólimsheleri 16 jastan asqan sheteldikter men azamattyǵy joq adamdardyń saýsaq izderin alady. Bul rásim ýaqytsha nemese turaqty turýǵa ruqsat rásimdeý kezinde, sondaı-aq yqtııarhat, azamattyǵy joq adamnyń kýáligi, bosqyn kýáligi men jol júrý qujatyn alǵash alý, qalpyna keltirý nemese aýystyrý barysynda júrgiziledi.
Sonymen qatar, Qazaqstan vızasyn rásimdeý kezinde de daktıloskopııalyq tirkeý júrgiziledi. Budan bólek, Qazaqstan aýmaǵynan shyǵarylýǵa jatatyn nemese readmıssııa jónindegi halyqaralyq kelisimderdiń talaptaryna kiretin sheteldikter men azamattyǵy joq adamdardyń da saýsaq izderi alynady.
Qujatta rásimniń ótkizilý tártibi de naqtylanǵan. Qujattar men vızalardy rásimdeý kezinde barlyq on saýsaqtyń izi boıaýsyz tásilmen, ıaǵnı skanerleý arqyly alynady. Eger júıe saýsaq izderin tanı almasa, qaıta skanerleý júrgiziledi. Qajet bolǵan jaǵdaıda daktıloskopııanyń ózge tásili qoldanylady.
12 jasqa tolmaǵan balalar memlekettik shekarany kesip ótý kezinde mindetti daktıloskopııalyq tirkeýden jáne saýsaq izderi arqyly jeke basyn rastaý rásiminen bosatylady.
Sondaı-aq vıza rásimdeý kezinde daktıloskopııalyq tirkeýden bosatylatyn adamdar sanaty da aıqyndaldy. Olardyń qatarynda shet memleketterdiń basshylary, dıplomatııalyq pasport ıeleri, resmı delegatsııalar músheleri jáne qaǵıdalarda kózdelgen ózge de tulǵalar bar.
ІІM málimetinshe, daktıloskopııalyq aqparat jeke tulǵany rastaý, sheteldik azamattardyń esebin júrgizý, qaýipsizdikti qamtamasyz etý jáne memlekettik shekaradan ótý kezinde baqylaýdy júzege asyrý maqsatynda paıdalanylady.
Al genomdyq aqparat qylmystardy tergeý, habar-osharsyz ketken adamdardy izdestirý, kim ekeni anyqtalmaǵan máıitterdiń jeke basyn anyqtaý jáne týystyq baılanysty rastaý úshin qoldanylady.
Buǵan deıin habarlanǵandaı, Syrtqy ister mınıstrligine daktıloskopııalyq tirkeý ókilettigi berildi.
