Qazaqstanda sáýlelik terapııa sapasyn baqylaýdyń ulttyq júıesi qurylmaq
ASTANA. KAZINFORM – Densaýlyq saqtaý mınıstri Aqmaral Álnazarova vedomstvonyń alqa otyrysynda eldegi onkologııalyq ortalyqtardaǵy jabdyqtardy, olardyń tıimdi qoldanylýyn jáne kadrmen qamtamasyz etilýin baǵalaý úshin jumys tobyn qurýdy tapsyrdy.
Mınıstrdiń aıtýynsha, aýdıt qorytyndylary negizinde 2026 jyldyń 1 naýryzyna deıin sáýlelik terapııa sapasyn baqylaýdyń biryńǵaı ulttyq júıesin ázirleý, sondaı-aq radıologııalyq qyzmet mamandaryn daıarlaýdyń maqsatty baǵdarlamasyn daıyndaý qajet. Sonymen birge kadr tapshylyǵy joǵary óńirlerge onkologııa rezıdentterin jiberý josparlanyp otyr.
Óńirlerge radıologtardy oqytýǵa qosymsha qarjy bólý, ıadrolyq medıtsına, patomorfologııa jáne ınterventsııalyq onkologııa boıynsha dárigerlerdiń biliktiligin arttyrýdy jalǵastyrý usynyldy.
Pallıatıvtik kómek kórsetý jelisin keńeıtý jáne bul qyzmettiń barlyq muqtaj patsıentter úshin qoljetimdiligin qamtamasyz etý kózdelýde.
Sonymen qatar onkoortalyqtar eksperttik endoskopııalyq ortalyqtardy jabdyqtaýdy aıaqtap, az ınvazıvti tehnologııalardy keńinen engizýi tıis.
Alqa barysynda medıtsınalyq aqparattyq júıelerdi jańartylǵan dıspanserlik jáne statsıonarlyq regıstrlermen tolyq ıntegratsııalaýdy aıaqtaý tapsyryldy.
Buǵan deıin júrgizilgen júıeli jumystardyń nátıjesinde onkologııada qoldanylatyn birqatar isikke qarsy preparattardyń baǵasyn 40 paıyzdan astam tómendetý múmkin bolǵany habarlanǵan edi.
Aıta keteıik, Almatyda júrek yrǵaǵy buzylǵan naýqastarǵa alǵash ret CSP ımplanty salyndy.