Qazaqstanda saýda-sattyqty bazarlardan birtindep saýda úılerine kóshirý josparlanýda
ASTANA. QazAqparat - QR Qarjy mınıstrliginiń Memlekettik kirister komıteti bıylǵy qyrkúıek aıynda Parlamentke «Saýda jáne saýda qyzmeti týraly» Zańǵa ózgerister engizý týraly usynysyn joldaıdy.
Bul týraly búgin OKQ-de ótken baspasóz máslıhatynda komıtet tóraǵasy Dáýlet Erǵojın aıtty.
«Bizdegi bar aqparat boıynsha qazirgi kezde Almaty qalasynyń saýda aınalymynyń 50 paıyzy bazarlar arqyly ótedi. Onyń ústine bazarlarda kassalyq apparattar joq bolǵandyqtan, barlyq saýda qolma-qol aqshamen júrgiziledi. Bylaısha aıtqanda, kóleńkede qalatyn qarajat óte kóp deýge bolady. Sondyqtan biz Ulttyq ekonomıka mınıstrligine osyǵan baılanysty sharalar qabyldaýdy uqsynǵan bolatynbyz. Birinshiden, biz 2018-2019 jyldarǵa qaraı birtindep saýda úılerinde saýda jasaýǵa ótýge tıispiz. Qazirgideı ashyq aspan astynda orta ǵasyrlardaǵy sııaqty saýda jasaýdan shyǵýymyz qajet», - dep atap ótti ol.
Komıtet tóraǵasynyń aıtýynsha, Germanııa men Frantsııada taýar aınalymynyń 95 paıyzy saýda úıleri, al qalǵan 5 paıyzy aptasyna bir ret ótkiziletin fermerlerdiń jármeńkeleri aıasynda bazarlar arqyly ótedi.
«Qazir siz kez kelgen bazarǵa baryp, kez kelgen taýardyń qaıdan shyqqany týraly sertıfıkatty talap etseńiz, ony eshqashan ala almaısyz. Mysaly, úshin kádimgi jemister men kókónisterdi alaıyq. Bizde syrttan kelgen taýardy túrli nıtrattar men hımııalyq qospalarǵa tekseretin kedendik zerthanalar men qurylǵylar bar. Mine, osy zerthanalardan syrttan kelgen 5 almanyń ekeýi ǵana ótedi dep senimmen aıta alamyn», - deıdi D. Erǵojın.
Onyń aıtýynsha, qazirgi kezde sáıkes normatıvtik-quqyqtyq aktiler jasalyp jatyr, olar daıyn bolysymen bıylǵy qyrkúıek aıynda Parlamentke jiberiledi.
