Qazaqstanda saýda salasynyń ósimi 5,1%-dy qurady
ASTANA. KAZINFORM – 2026 jylǵy qańtar-sáýir qorytyndysy boıynsha Saýda salasynyń naqty kólem ındeksi (NKI) ótken jyldyń sáıkes kezeńimen salystyrǵanda 105,1% boldy. Byltyr qańtar-sáýirde atalǵan kórsetkish 107% bolǵan. Bul týraly statıstıkalyq málimetterde aıtyldy.
Atap aıtqanda, 2026 jyldyń alǵashqy tórt aıynda kóterme saýdanyń naqty kólem ındeksi 105,9%-dy qurady. Al bólshek saýdanyń NKI-i 103,4% boldy. Ótken jyldyń sáıkes kezeńinde bul kórsetkishter tıisinshe 107,4% jáne 106,1% deńgeıinde tirkelgen.
Saýda salasynyń jalpy qurylymynda kóterme saýdanyń úlesi basym – 67,7%. Al bólshek saýdanyń úles salmaǵy 31,8%-dy quraıdy.
Bıýro dereginshe, 2026 jylǵy qańtar-sáýirde kóterme saýda kólemi 15 068,8 mlrd teńgege jetti. Bul 2025 jyldyń sáıkes kezeńimen salystyrǵanda 5,9%-ǵa artyq. Kóterme taýar aınalymynyń qurylymynda azyq-túlik emes taýarlar men óndiristik-tehnıkalyq maqsattaǵy ónimder basym bolyp, jalpy kólemniń 80%-yn quraǵan.
Respýblıkanyń kóterme saýda kólemindegi eń joǵary úles Almaty qalasyna tıesili – 36,7%. Sonymen qatar Atyraý oblysynyń úlesi 15,2%, Astana qalasynyń úlesi 14,3%, Qaraǵandy oblysynyń úlesi 5,3% boldy.
Sonymen qatar esepti kezeńde bólshek saýda kólemi 7 082,2 mlrd teńgeni qurap, ótken jyldyń sáıkes kezeńinen 3,4%-ǵa ósti. Saýda kásiporyndarynyń bólshek saýdadaǵy ótkizý kólemi 1%-ǵa artsa, dara kásipkerlerdiń, onyń ishinde bazarlarda saýda jasaıtyndardyń kórsetkishi 4,6%-ǵa ulǵaıǵan.
Jyl basynan beri jeke menshik nysanyndaǵy kásiporyndardyń bólshek saýdadaǵy aınalymy 6 229,3 mlrd teńgege jetti. Bul jalpy bólshek saýda kóleminiń 88%-yn quraıdy. Al sheteldik menshik nysanyndaǵy kásiporyndardyń úlesine 852,8 mlrd teńge nemese 12% tıesili boldy.
2026 jylǵy 1 mamyrdaǵy jaǵdaı boıynsha bólshek saýda kásiporyndaryndaǵy taýar qory 1 719,5 mlrd teńgeni qurady. Saýda kúnderimen eseptegende bul kórsetkish 68 kúnge teń.
Bólshek saýda qurylymynda azyq-túlik taýarlarynyń úlesi 31,1%, al azyq-túlik emes taýarlardyń úlesi 68,9% boldy. Azyq-túlik ónimderin ótkizý kólemi ótken jyldyń sáıkes kezeńimen salystyrǵanda 10,5%-ǵa, azyq-túlik emes taýarlardy ótkizý kólemi 0,6%-ǵa artqan.
2026 jylǵy qańtar-sáýirde respýblıkanyń bólshek saýda kólemindegi eń joǵary úles Almaty qalasynda tirkeldi – 31,5%. Odan keıin Astana qalasy – 13,2%, Qaraǵandy oblysy – 7,7% jáne Shyǵys Qazaqstan oblysy – 5,6% kórsetkish kórsetti.
Aıta keteıik, 2026 jylǵy qańtarda Qazaqstandaǵy kóterme saýda kólemi 3 048,5 mlrd teńgeni qurap, 2025 jylǵy sáıkes kezeń deńgeıinen 103,2%-dy kórsetti.
