Qazaqstanda saýda salasyna ınvestıtsııalar 22,3%-ǵa ósti
ASTANA. KAZINFORM – Qazaqstanda saýda salasyna jáne onymen baılanysty baǵyttarǵa ınvestıtsııa tartýdyń oń dınamıkasy saqtalyp otyr. 2026 jyldyń qańtar-shilde aılarynyń qorytyndysy boıynsha ınvestıtsııalar kólemi 637,2 mlrd teńgeni qurap, ótken jyldyń sáıkes kezeńimen salystyrǵanda 22,3%-ǵa ósti, dep habarlaıdy Saýda jáne ıntegratsııa mınıstrligi.
Oń dınamıka birqatar óńirde baıqalady. Ásirese Soltústik Qazaqstan jáne Qaraǵandy oblystarynda, Shymkent qalasynda, Qostanaı, Abaı, Mańǵystaý oblystarynda jáne Almaty qalasynda ósimniń joǵary qarqyny tirkeldi.
Almaty ınvestıtsııalyq belsendiliktiń iri ortalyqtarynyń biri bolyp qala beredi. Jeti aıda qalaǵa 204,3 mlrd teńge ınvestıtsııa tartyldy. Túrkistan oblysynda da ınvestıtsııa kólemi aıtarlyqtaı bolyp, 88,7 mlrd teńgeni qurady.
– Investıtsııalardyń ekonomıkalyq qyzmet túrleri boıynsha qurylymynda eń úlken úles kóterme jáne bólshek saýdaǵa tıesili – 246,6 mlrd teńge. Іrgeles baǵyttar boıynsha da qomaqty ınvestıtsııalar qarjy jáne saqtandyrý qyzmetine, jyljymaıtyn múlikti jalǵa berý jáne basqarýǵa, sondaı-aq ǵımarattarǵa qyzmet kórsetý men aýmaqtardy abattandyrýǵa baǵyttalýda, – delingen mınıstrlik málimetinde.
Oń dınamıka iskerlik belsendiliktiń artyp, saýda salasynyń ınvestıtsııalyq bazasynyń keńeıip kele jatqanyn kórsetedi. Jańa ınvestıtsııalar saýda ınfraqurylymyn damytýǵa, saýdanyń zamanaýı formattaryn keńeıtýge jáne kásipkerler úshin jańa múmkindikter qalyptastyrýǵa baǵyttalyp otyr.
Saýda jáne ıntegratsııa mınıstrligi ákimdiktermen birlesip ınvestıtsııalar tartý, jobalardy súıemeldeý jáne zamanaýı saýda ınfraqurylymyn odan ári damytý úshin qolaıly jaǵdaılar jasaý boıynsha júıeli jumysty jalǵastyryp jatyr.
Aıta keteıik, Atyraýda 1 mlrd teńgelik ınvestıtsııalyq jobany iske asyrýǵa zańsyz kedergi jasalǵan.
