Qazaqstanda saýda nysandaryna arnalǵan standart ázirlendi
ASTANA. KAZINFORM - Qazirgi tańda tutynýshylarǵa jańa taýarlar men kórsetiletin qyzmetter usynylady, zamanaýı satý ádisteri men qyzmet kórsetý nysandary engizilýde.
Osy ózgeristerge jaýap retinde Saýda jáne ıntegratsııa mınıstrliginiń Saýda komıteti men Tehnıkalyq retteý jáne metrologııa komıteti QazStandartpen birlesip QR ST 1754-2024 «Saýda obektilerin klassıfıkatsııalaý» dep atalatyn ulttyq standartty ázirlep, qoldanysqa engizdi.
Jańa standart «Saýda qyzmetin retteý týraly» QR Zańyna jáne Іshki saýda erejelerine tolyq sáıkes keledi. Onda termınder jańartyldy, saýda obektilerin klassıfıkatsııalaý jáne olarǵa qoıylatyn jalpy talaptar belgilendi.
Satýshynyń qatysýynsyz taýarlardy satýǵa jáne tamaq ónimderin avtomatty daıyndaýǵa, ótkizýge arnalǵan avtomattandyrylǵan qurylǵyny bildiretin «Vendıng avtomat» degen jańa termındi mysal retinde aıtýǵa bolady.
Standart sonymen qatar saýda obektilerin bylaısha jikteýdi qamtıdy:
- saýda qyzmetindegi kóp fýnktsıonaldy ǵımarat (keshen);
- kóterme-taratý ortalyǵy;
- saýda-oıyn-saýyq ortalyǵy;
- saýda ortalyǵy;
- saýda úıi;
- gıpermarket;
- sýpermarket;
- shaǵyn market;
- modernızatsııalanǵan saýda naryǵy;
- dúken (úı janyndaǵy dúken);
- aýtlet ortalyǵy;
- dıskaýnt ortalyǵy;
- saýda naryǵy;
- jyljymaly sóre;
- shatyr (pavılon);
- dúńgirshek;
- avtomat;
- vendıng avtomat;
- avtodúken.
QazStandart sarapshylary «Saýda obektilerin klassıfıkatsııalaý biryńǵaı ólshemsharttary tutynýshylarǵa naryq usynystaryna súıenýge jáne olardyń sanaty men qyzmet kórsetý deńgeıin eskere otyryp, satyp alý oryndaryn tańdaýǵa kómektesedi» dep atap ótti.
Jańa standart tutynýshylarǵa yńǵaılylyq pen jaılylyqty arttyra otyryp, naryqqa qatysatyn barlyq qatysýshylar úshin ashyq jáne túsinikti júıeni qurýǵa yqpal etedi.
