Qazaqstanda satylǵan árbir ekinshi jańa kólik - otandyq ónim
«Mashına jasaý - óńdeýshi ónerkásiptiń serpindi damyp kele jatqan salalarynyń biri. Indýstrııalandyrý baǵdarlamasyn júzege asyrý jyldary salada óndiris kólemi 5 ese ósti. Salaǵa tartylǵan ınvestıtsııalar kólemi úsh ese ósip, 50 mlrd teńgeni qurady. Eksport kólemi shamamen 3 esege artyp, 1,1 mlrd AQSh dollaryn qurady. 2019 jyldyń qorytyndysy boıynsha, 1 trln 372 mlrd teńgege ónim óndirildi. 2020 jyldyń bes aıynda 535 mlrd teńgege ónim óndirildi. Ósim 18,5 paıyzdy qurady», - dedi mınıstr QR Úkimeti otyrysynda.
Onyń aıtýynsha, atalmysh salada shamamen 3 myń kásiporyn jumys isteıdi, onda 65 myń adam eńbek etedi. Indýstrııalandyrý baǵdarlamasyn iske asyrý jyldary mashına jasaý salasynda 367 mlrd teńgege 128 joba iske asyrylyp, 16 myńǵa jýyq jumys orny quryldy.
«2019 jyly eńbek óndimdiligi 16 myń AQSh dollaryn qurady. Eksporttalatyn ónim qatary keńeıtildi. Qazir bizdiń kásiporyndar Reseı, Qytaı, Ázerbaıjan, Tájikstan, BAÁ, Túrkimenstan jáne t.b. elderge ónim ekporttaıdy. Mashına jasaý ónimderiniń jańa túrleri jolaýshylar vagondary, elektrovozdar, temirjol dońǵalaqtary men beldikteri, baǵyttamaly burmalar óndirisi uıymdastyryldy. «Asia Trafo» AQ TMD elderi aýmaǵynda birinshi bolyp, qýaty 500 megavolt/amper deıingi qýatty transformatorlar óndirisin ıgerdi», - dedi spıker.
Mashına jasaý salalary arasynda joǵary nátıjeni - kólik qurastyrý baǵyty kórsetip otyr. Mundaǵy óndiris kólemi 24,5 esege ósip, ınvestıııalardyń jyl saıynǵy aǵyny 14,4 esege artty.
«Qazaqstandyq avtoónerkásip ónimi eksporttyq naryqqa shyqty. Bul rette el ishinde satylǵan árbir ekinshi jańa jeńil kólik - otandyq ónim bolyp tabylady. Salanyń basty kásiporyndary – «Saryarqa AvtoProm», «Hyundai Trans Auto», «AzııaAvto», «KAMAZ – Injınırıng», «SIMAS» jáne «Daewoo Bus Kazakhstan». 2020 jylǵy qańtar-mamyr aılarynda jalpy quny 173 mlrd teńgege 26 810 kólik óndirildi. Ósim 47 paıyzdy qurady. Osy kezeńde Reseı, Belarýs, Qyrǵyzstan, Tájikstan jáne Ózbekstanǵa 1659 jeńil avtokólik eksporttaldy», - dep atap ótti spıker.
Almaty qalasynda Hyundai Trans Kazakhstan zaýyty salyndy. Zaýyttyń qýattylyǵy jylyna 45 myń jeńil kólik shyǵarýǵa múmkindik beredi. Birinshi kezeń - 2020 jyldyń naýryz aıynda sátti iske qosyldy. Shanaqty balqytý men boıaý boıynsha tehnologııalyq operatsııalar esebinen avtomobılderdi usaq toraptyq jınaý iske asyrylatyn bolady.
«Saryarqa AvtoProm» «Ózbek AvtoPrommen» birge Ravon, Chevrolet eksportqa baǵyttalǵan avtokólikteri óndirisi syndy birqatar mańyzdy ınvestıtsııalyq jobalardy iske asyryp otyr. Qaraǵandy oblysynyń Saran qalasynda Kaztehno kompanııasy qytaılyq kompanııamen birlesip, Youtong avtoýstar, Kaztaır teh kompanııasy «Doublestar» kompanııasymen birlese otyryp, jeńil avtokólikter úshin 3 mln jáne kommertsııalyq tehnıka men avtobýstar úshin - 500 myń shına shyǵaratyn joba, KamAZ AQ birlesip, quıý zaýytyn salý jónindegi jobalar iske asyrylýda», - dedi Beıbit Atamqulov.
