Qazaqstanda satylǵan árbir ekinshi avtokólik elimizde qurastyrylǵan

ASTANA. QazAqparat - 2019 jyldyń sońyna deıin  elimizdiń júk vagondary parki 3 myń birlikke artady.  Bul týraly búgin QR Investıtsııalar jáne damý mınıstrligi Indýstrııalyq damý jáne ónerkásiptik qaýipsizdik komıtetiniń tóraǵasy Almas Batanov aıtty, dep habarlaıdy QazAqparat tilshisi.

«Mashına jasaý salasynda eleýli nátıjelerge qol jetkizdik, ósim  16 paıyzdy  quraıdy. Óndiristiń kúrt ósýine - naryqtaǵy suranystyń qalpyna kelýi, eksporttyq naryqtardyń ashylýy, sondaı-aq memleket tarapynan jeńildikti avtonesıelendirý baǵdarlamasy sebepshi boldy. Olar avtomobıl jasaý sektorynyń damýyna oń áserin tıgizdi. Bul rette Qazaqstanda satylǵan árbir ekinshi avtokólik Qazaqstanda óndirilgendigin atap ótken jón. Al ótken jyly árbir úshinshi avtokólik otandyq óndiristen bolǵan edi», - dedi Almas Batanov.

Komıtet basshysynyń dereginshe, elektr-tehnıkalyq mashına jasaýda «Alageum Electric» AQ Qazaqstanda transformator óndiretin 4-shi zaýyt salyp jatyr. Sondaı-aq atalǵan kompanııa Soltústik Qazaqstanda jáne Tájikstanda óndirisin damytýdy josparlap otyr.

«Transformatorlar óndirisi 2 esege ósti, kabeldi-ótkizgishti ónimder 95, elektr akkýmýlıatorlar jasaý 14,6 paıyzǵa artty. Ósimge TMD naryǵyna, ásirese Reseı Federatsııasyna eksporttyq jetkizilimderdi arttyrý múmkindik berdi»,-  dedi ol.

Onyń sózine qaraǵanda, kombaındar, traktorlar jáne avtobýstar lızıngine 13 mlrd teńge kóleminde bıýdjet qarajaty bólindi. Temirjol mashınasyn jasaýdy damytýǵa «BRK-Lızıng» AQ 50 mlrd teńge bólip otyr. Sonyń arqasynda 2019 jyldyń sońyna deıin júk vagondarynyń parki 3000 birlikke tolyǵady.