Qazaqstanda satylǵan 5 kóliktiń úsheýi elimizde qurastyrylǵan
Energyprom.kz portalynyń málimetinshe, elimizde avtomobıl ónerkásibi men avtomobıl qurastyrý salasyna úlken úmit artylyp otyr.
Tipti, bul sala Qazaqstan ındýstrıalızatsııasynyń draıverine aınalýy da yqtımal.
Máselen, ótken jyly avokólik quraldaryn, treıler men jartylaı tirkemelerdi qurastyrý 24,3 paıyzǵa, 739,1 mlrd teńgege deıin ósti.
Strategııalyq josparlaý jáne reformalar agenttigi ulttyq statıstıka bıýrosynyń resmı derekterine qaraǵanda, ótken jyly elimizdiń mashına jasaý óndirisiniń jalpy kóleminde avtokólik quraldary, treıler men jartylaı tirkemeler qurastyrý 2 óńirde basymdyqqa ıe boldy: Qostanaı oblysynda – 79,7 paıyz (395,9 mlrd teńge), Almatyda — 62,6 paıyz (246,9 mlrd teńge).
Qostanaı oblysynda «SaryarqaAvtoÓnerkásip» avtozaýyty, Almatyda Hyundai Trans Kazakhstan men Hyundai Trans Almaty zaýyttary jumys isteıdi.
Avtoónerkásipte Shyǵys Qazaqstan men Aqmola oblystarynyń da úlesi basym.
Qazaqstan avtomobıl bıznesi qaýymdastyǵynyń málimetterine qaraǵanda, QR avtoónerkásip óndirisiniń kólemi 782,1 mlrd teńgeni qurady.
Al bir jyl buryn bul kórsetkish 612,8 mlrd teńge bolǵan edi.
Aıta keterligi, Hyundai Trans Kazakhstan men Hyundai Trans Almaty zaýyttary bir jyldyń ishinde óndiristi úsh ese arttyryp otyr.
Atalǵan kásiporyndar 2020 jyly 100,4 mlrd teńgeniń, al ótken jyly 293,7 mlrd teńgeniń kóligin qurastyrǵan.
Elimizdiń 1 jyldyń ishinde avtomobıl óndirisi 20 paıyzǵa artyp, 92,8 myń kólik qurastyryldy.
Pandemııaǵa baılanysty logıstıkada týyndaǵan qıyndyqtarǵa, álemdegi jartylaı ótkizgishter tapshylyǵyna qaramastan avtomobıl satý 25,9 paıyzǵa artyp, 117,6 myń birlikke jetti.
Ótken jyly satylǵan kólikterdiń ishinde otandyq avtomobıl úlesi basym túsip, 62,2 paıyzǵa jetti.
Qazaqstandyq avtomobılder eksporty da bir jyldyń ishinde 1,5 paıyzǵa artyp, 12,1 myń kólikti qurady.
