Qazaqstanda satylatyn taýarlardyń tórtten biri tehnıkalyq reglamentterge saı emes
Otyrysqa QR Ulttyq ekonomıka mınıstrligi Tutynýshylar quqyǵyn qorǵaý komıtetiniń, memlekettik organdar men iri saýda ókilderi qatysty. Tutynýshylar quqyǵyn qorǵaý komıteti Tehnıkalyq reglamentter men sanıtarlyq sharalar talaptarynyń saqtalýyn baqylaý basqarmasynyń basshysy Nurqan Sádýaqasovtyń aıtýynsha, tekserý boıynsha alynǵan 15151 taýardyń 3936-sy tehnıkalyq reglamentke sáıkes kelmeıdi. Onyń ishinde 81% - azyq túlik ónimderi, 14% - balalar oıynshyqtary men balalar taýarlary, 2% - hımııalyq jáne munaıhımııalyq zattar, 2% - parfıýmerııalyq-kosmetıkalyq ónimder, 1% - azyq túlik salasyna qatysty materıaldar men qurylǵylar.
Málimetterge qaraǵanda, tehnıkalyq reglament talaptarynyń buzylýyna negizinen mynalar sebep bolǵan: markırovka erejeleriniń saqtalmaýy - 68%, qaýipsizdik talaptaryna saı emesteri - 19%, tutynýshylarǵa túsiniksiz aqparattar jazylǵan - 13%.
«Talapty buzatyn taýarlardyń eń kóp úlesi sút ónimderin quraıdy - 26%. Budan keıingi oryndarda et jáne et ónimderi - 15%, qus eti men onyń ónimi - 13%, kondıter buıymdary - 10%, kókónis ónimderi - 5%, shyryn jáne alkogolsiz ishimdikter - 1% bolyp otyr. Al tehnıkalyq reglamentke saı kelmeıtin taýarlar shyǵarylǵan elder arasynda kósh bastap turǵan Reseı - 52%, qazaqstandyq taýarlar - 23%, 4% - Qyrǵyzstan ımporty, 3% - Belarýs, jáne 3% - Ýkraına taýarlary», delingen baspasóz baıanynda.
Tekserý qorytyndylary boıynsha elimizde satylatyn árbir tórtinshi taýardyń qaýipsizdik jónindegi qujaty joq ekendigi, naqtylap aıtqanda satylatyn taýarlardyń sáıkespeıtindigi boıynsha 3198 fakti oryn alǵan. Al 796 jaǵdaıda taýarlarǵa qandaı da bir qujattar joq bolyp shyqqan.