Qazaqstanda satýshylardy anyqtaýǵa arnalǵan QR kod qoldanylmaq

NUR-SULTAN. QazAqparat – Azamattyq qoǵamdy kóleńkeli ekonomıkaǵa qarsy is-qımylǵa tartý maqsatynda Memlekettik kirister komıteti birqatar pılottyq jobalardy júzege asyrýda. Bul týraly Ortalyq kommýnıkatsııalar alańynda ótken baspasóz máslıhatynda komıtet basshysy Marat Sultanǵazıev aıtty, dep habarlaıdy QazAqparat tilshisi.

Atap aıtqanda, óz tabysyn jasyratyn azamattardy anyqtaýǵa baǵyttalǵan «Azamattyq baqylaý - túbirtek talap etý» jobasy júzege asyrylýda. Joba barysynda Wipon mobıldi qosymshasy arqyly túbirtektiń berilmegeni týraly 16,5 myń habarlama kelip túsken. Onyń 5,5 myńy rastalyp, olar úshin 4,5 mln teńge kóleminde syıaqy tólengen.

Sonymen qatar Marat Sultanǵazıev «dári-dármekterge arnalǵan elektrondy shot-faktýra shyǵarý boıynsha» pılot týraly aıtyp ótti. Joba kez-kelgen túrdegi dári-dármekterdi baqylaý maqsatynda 2020 jyly bastalǵan. Qatysýshylar sany 6,7 myńǵa deıin ósken.

«Azamattyq belsendilikti arttyrýdyń taǵy bir mańyzdy jobasy – arnaıy beıne jáne fotografııalyq quraldardy qoldanatyn «vızýaldy tekserý» pıloty. QR kodtary MKK veb-saıtynda jasalyp, onyń kómegimen satyp alýshy satýshyny anyqtaı alady. Bul baǵyttaǵy túsindirý jumystary bastalyp ketti. EAEO sheńberinde taýar aınalymynyń baqylanýyn qamtamasyz etý maqsatynda 2021 jyldan bastap «Vırtýaldy qoıma» modýlinde resimdeletin taýarlarǵa ilespe qujattar shyǵarý jobasy bastaldy. Búgingi kúni birqatar problemalar anyqtaldy, biz olardy sheshýge kiristik. Pılot kezinde aıyppuldar qoldanylmaıtynyn atap ótkim keledi», - dedi Marat Sultanǵazıev.