Qazaqstanda sary maı óndirisi azaıdy – mınıstr sebebin túsindirdi
NUR-SULTAN. QazAqparat – QR Aýyl sharýashylyǵy mınıstri Erbol Qarashókeev Qazaqstandaǵy sary maı óndirisiniń nelikten azaıǵanyn túsindirdi, dep habarlaıdy QazAqparat tilshisi.
«Elimizde sary maı óndirisi qalaı bolyp jatyr? Suranys artsa da, óndiris kerisinshe azaıýda deıdi. Bul qanshalyqty ras?», - degen suraq qoıyldy Úkimettegi baspasóz máslıhatynda.
Rasynda bıyl bizde sary maı óndirisi kólemi sál azaıyp jatyr. Onyń basty sebebi – halyqtyń suranysy.
«Negizgi maı shyǵaratyn shıkizat – sút qoı. Elimizde sút óndirisi ósip jatyr, shıkizat tapshylyǵy joq. Bıylǵy 7 aı qorytyndysy boıynsha 2,7 mln tonna sút óndirilgen, bir keli maı óńdeý úshin 20-24 lıtr sút qajet. Maı satatyndardyń tabysy asa kóp emes, bir ónimdi alty aıdaı satýy múmkin. Sosyn maı naryǵynda báseke óte joǵary. Sondyqtan óndirýshilerdiń ózi maıdy óńdemeı, qaımaq pen ıogýrt jasaýǵa aýysyp ketýi múmkin. Naryqtyń balansy osyndaı bolyp tur. Sary maı az bolady, qant sekildi tapshy bolady degen sóz emes. Sebebi bizde sút jetkilikti, kerek kezde suranys bolsa, sútten qajet kólemdi ala alamyz», - dep jaýap berdi E. Qarashókeev.
Sonymen birge, Aýyl sharýashylyǵy mınıstri ımporttyq báseke máselesin de atap ótti.
«Syrttan da sary maı kelip jatyr, baǵasy bizdikinen tómen bolýy múmkin, sol sebepti maı óndirisiniń azaıýy – maı jasaýshylardyń óz sheshimi, naryqtyń suranysy. Byltyr sary maıdy negizgi ımporttaýshylar – kórshiles Reseı men Belarýs boldy, Ýkraınadan da maı jetkizilgen edi. Statıstıka boıynsha, byltyrǵy 7 aıda maı óńdeý kólemimiz 11 paıyzǵa tómendedi. Sondyqtan 2 myń tonnaǵa deıin maı ımporty ósken. Negizi balans saqtalyp otyr. Sary maıdy kóbeıtý úshin suranys bolýy kerek. Suranys bolsa, zaýyttardyń ózderi naryqqa qarap, maıdy shyǵarý tıimdi ekenin kórse, óndiristi ósire salady. Eń bastysy, qajet bolǵan jaǵdaıda sút bar. Eshqandaı kedergi joq», - dedi Erbol Qarashókeev.
Buǵan deıin mınıstr eldegi bıdaı men unnyń qory men baǵasyna boljamdaryn aıtqan edi.
