Qazaqstanda sapasyz ónimge qatysty 136 kásipker jaýapqa tartyldy
ASTANA. KAZINFORM — Bıylǵy jyldyń alǵashqy toqsanynda «Sapaly ónim» jobasy aıasynda tekserilgen ónimderdiń 49%-ynan zań buzýshylyq anyqtaldy. Bul týraly OKQ alańynda QR Saýda jáne ıntegratsııa mınıstrligi Tutynýshylardyń quqyqtaryn qorǵaý komıtetiniń tóraǵasy Bolat Tanabergenov aıtty.
Onyń málimetinshe, bıylǵy alǵashqy úsh aıda elimiz boıynsha 363 túrli ónim tekserilgen.
— Tekserý nátıjesinde 179 ónimnen zań buzýshylyq anyqtaldy. Bul barlyq tekserilgen ónimniń 49%-yn quraıdy. Zań buzýshylyqtardyń 77%-y tańbalaý talaptaryna qatysty bolsa, 23%-y sanıtarııalyq-epıdemıologııalyq talaptardyń saqtalmaýyna baılanysty boldy. Sonyń nátıjesinde 136 kásipkerlik sýbektisi ákimshilik jaýapkershilikke tartyldy, — dedi Bolat Tanabergenov.
Buǵan deıin qazaqtandyqtar tutynýshy quqyǵyn qorǵaý boıynsha ótinish jazýdy jıiletkenin jazǵan edik.
