Qazaqstanda sapaly avtomobıl joldarynyń úlesin 60 paıyzǵa jetkizý kózdeledi - AEF

ASTANA. 22 mamyr. QazAqparat - Qazaqstanda sapaly avtomobıl joldarynyń úlesin 60 paıyzǵa jetkizý kózdeledi. Búgin VI Astana ekonomıkalyq forýmy aıasynda kólik baǵyttary men logıstıkalyq ortalyqtardy damytý, tranzıttik áleýetti arttyrý jáne halyqaralyq yntymaqtastyqty qalyptastyrý máseleleri talqylanǵan paneldik sessııa barysynda Kólik jáne kommýnıkatsııa mınıstri Asqar Jumaǵalıev osylaı málim etti.

Jıyn barysynda mınıstr «Qazaqstannyń kóliktik ınfraqurylymyn 2020 jylǵa deıin damytý» týraly ázirlenip jatqan baǵdarlamanyń negizgi baǵyttaryna toqtalǵan bolatyn. Onyń aıtýynsha, baǵdarlamany iske asyrý aıasynda Qazaqstan arqyly ótetin tranzıttik júk tasymalynyń kólemin 2 esege arttyrý, sapasy jaqsy avtomobıl joldarynyń úlesin 60 paıyzǵa jetkizý kózdeledi. Sonymen qatar, Qytaı tarapynan 10 mln. tonnaǵa deıin qosymsha tranzıttik júk tasymaly aǵynyn tartý josparlanady. «Bul óz kezeginde, Qazaqstannyń álemdik kóliktik-logıstıka júıesimen yqpaldasýyna, jańa jumys oryndarynyń ashylýyna, kólikte qyzmet kórsetý sapasy men qaýipsizdiginiń artýyna múmkindik beredi» deıdi mınıstr A. Jumaǵalıev.

Budan bólek, Memleket basshysynyń «Ortalyq - Ońtústik», «Ortalyq - Shyǵys», «Ortalyq - Batys» baǵyttaryn damytý jónindegi tapsyrmasyn iske asyrý maqsatynda 2013 jyly Astana - Almaty, Astana - Aqtaý, Astana - Óskemen arasynda zamanaýı avtomobıl joldarynyń qurylysyn bastaý josparlanǵan.