Qazaqstanda sanfaıans, qysh taqtaı, mıneraldyq jylytqysh materıal shyǵaratyn zaýyttar salynady

NUR-SULTAN. QazAqparat –QR Indýstrııa jáne ınfraqurylymdyq damý mınıstri Qaıyrbek Óskenbaev Úkimet otyrysynda qurylys materıaldarynyń ımportyn qalaı azaıtýǵa bolatynyn aıtty, dep habarlaıdy QazAqparat.

«Jyl qorytyndysy boıynsha, qurylys materıaldarynyń óndirisi 9,8 %-ǵa ósip, 902,7 mlrd. teńge boldy. Óńdeýshi ónerkásip qurylymyndaǵy salanyń úlesi shamamen 5,5 %-dy quraıdy. Salada 2472 kásiporyn jumys isteıdi, olarda shamamen 26,2 myń adam jumys isteıdi», - degen mınıstr jalpy qurylys materıaldarynyń ishki naryǵy 2,7 mlrd dollardy quraǵanyn, onyń ishinde otandyq óndiristiń úlesi - 57%, al ımport - 43% bolǵanyn aıtty.

«Kórip otyrǵanymyzdaı, qazaqstandyq óndirýshiler ishki naryqtyń beton, tsement, qabyrǵa materıaldary sııaqty bazalyq qurylys materıaldaryna qajettiligin tolyq kólemde jabady. Barlyq jerde qurylysta jáne jóndeý kezinde tek qazaqstandyq gıpsokarton men qurǵaq qurylys qospalary qoldanylady.

Alaıda, ımportqa táýeldi qurylys materıaldary árleý segmentiniń qosylǵan quny joǵary taýarlar bolyp otyr. Ádette, bul árleý materıaldary, tusqaǵazdar, lınoleým, jylý oqshaýlaǵysh materıaldar, sanfaıans jáne shyny buıymdary», - dedi Qaıyrbek Óskenbaev.

Sondaı-aq, ol jaqyn arada 8 616 jańa jumys ornyn qamtamasyz etetin, jalpy quny 601,3 mlrd teńge bolatyn 35 ımportty almastyrý jobasy qolǵa alynatynyn málim etti.

«Sanfaıans, qysh taqtaılar, mıneraldyq jylytqyshtar, aǵash-súrekti taqtalar sııaqty otandyq qurylys taýarlarymen qamtamasyz etý boıynsha jańa óndiristerdi ashý kózdelip otyr.

Bul jobalardy engizý ishki naryqtaǵy ımport úlesin shamamen 60%-ǵa tómendetýge múmkindik beredi jáne qurylys materıaldary baǵasynyń aýytqýyn boldyrmaıdy», - dedi vedomstvo bashysy.

Aıtýynsha, atalǵan jańa jobalar iske assa, 2025 jylǵa qaraı 700 mln dollar bolatyn 10-nan astam ónim ózimizde óndirile bastaıdy.

«Taýar pozıtsııalary bólinisinde mynadaı qurylys materıaldary – temirbeton buıymdar, beton, qurǵaq qospalar, lak boıaý, kirpishter, shyny, kabelder, aǵash-súrekti taqtalar jáne qasbettik taqtalar boıynsha ishki naryqty 100% jabý josparlanǵan.

Sondaı-aq, ımportqa táýeldi qurylys materıaldary -alıýmınıı radıatorlary, polıetılen qubyrlary, shatyr materıaldary, radıatorlar, metall jabyndar, esik bloktary, qysh taqtalar, sanfaıans jáne armatýra boıynsha ishki naryqtyń 50 %-dan astamyn jabý josparlanǵan», -dedi mınıstr.