Qazaqstanda sandyq telearnaǵa kóshý úsh kezeńde júzege asyrylady
ALMATY. 12 qarasha. QazAqparat /Erbol Azanbek/ - Qazaqstanda sandyq telearnaǵa kóshý 3 kezeńde júzege asyrylyp, 2015 jyly aıaqtalady.
Bul týraly búgin Almatyda ótken úshinshi medıaquryltaı barysynda QR BAM Aqparat jáne muraǵat komıtetiniń tóraǵasy Bolat Bersebaev aıtty.
«Sandyq telearnaǵa kóshýdiń birinshi kezeńi - «Spýtnıktik sandyq telearnany» engizýdi bıylǵy jyldyń aıaǵyna deıin júzege asyrý kózdelgen. Bul boıynsha spýtnıktiń mýltıpleks, ıaǵnı kontenttik toptama engiziledi. Bul toptamaǵa qansha telearna engiziletini Úkimet basshysynyń tóraǵalyǵymen ótetin respýblıkalyq keńeste aıqyndalady. Reseıde spýtnıktik mýltıplekske 37+1 arna, al jerlik spýtnıktik taratýdyń toptamasyna 12-14 arna engizilgen. Al ekinshi kezeńde jerlik spýtnıktiń taratý júıesin engizý josparlanyp otyr. Úshinshi kezeńde aımaqtyq mýltıplesksterdi qalyptastyrý josparlanǵan»,- dedi B.Bersebaev. Ol sondaı-aq óz sózinde sandyq telearnany engizýdiń áleýmettik mańyzdy joba ekendigine toqtaldy. «Qazaqstan halqynyń 50 paıyzyna jýyǵy óz arnalarymyzdy kóre almaıdy. Mysaly alys aýyldy jerlerde otandyq telearnalardyń sıgnaldary nashar. Sondyqtan aýyl halqynyń kóbi spýtnıktik tabaqshalar arqyly basqa eldiń arnalaryn kóredi. Olar kóretin arnalardyń ishinde nebir beıádep dúnıelerdi usynatyn BAQ-tar bar. Sondyqtan sandyq telearnaǵa kóshý aqparattyq qaýipsizdigimizdi saqtaýǵa, kórermenderimizge óz ónimderimizdi usynýǵa múmkindik beredi»,- dep atap ótti ol.
Al Ulttyq telekommýnıkatsııa qaýymdastyǵy ókilderiniń aıtýynsha, sandyq telearnaǵa kóshýdi tezdetken jón. «Óıtkeni bunyń joǵarydaǵy máselelermen qatar tehnıkalyq áleýeti de zor. Sandyq júıe qosylsa qazir biz kórip otyrǵan 10 balama arnanyń ornyna 70 arnany, 3D formatyndaǵy týyndylardy kórýge múmkindik bar. Sondaı-aq bir arnanyń 2-3 tilde aqparat taratyp, qazaq, orys tilderinde qatar kórýge, qazirgi 50/50 degen máseleni sheshýge múmkindik týar edi. Óıtkeni kórermen bir arnany ózi qalaǵan tilinde kóre alady», deıdi qaýymdastyq ókili.
