Qazaqstanda sanavıatsııa apatqa ushyraǵan 48 adamdy elge jetkizgen

ASTANA. QazAqparat - Qazaqstannyń sanıtarııalyq avıatsııasy qyzmetin bastaǵaly beri apatqa ushyraǵan 48 qazaqstandyqty elge jetkizgen, dep habarlaıdy QazAqparat tilshisi QR Densaýlyq saqtaý mınıstrliginiń baspasóz qyzmetine silteme jasap.

«Jalpy, 2011 jyldan qazirge sheıin Qazaqstan Respýblıkasynyń sanıtarııalyq avıatsııasy alys-jaqyn shetelderden (Taıland, Túrkııa, Shveıtsarııa, AQSh, Ońtústik Koreıa, Mysyr, Qyrǵyzstan, Qytaı, Reseı, t.b.) 48 QR azamatyn elge jetkizdi», - delingen habarlamada.

Shetelde zardap shekken Qazaqstan azamattary qaı elden bolmasyn, respýblıkalyq bıýdjet qarajaty esebinen ákelinedi.

Sanıtarııalyq avıatsııa qurylǵaly 15 myń qazaqstandyqqa kómek kórsetilgen, sonyń 2 537-si akýsherlik aýytqýy bar áıelder, 2 460-y jańa týǵan sábı, 3 249-y bala, 2 365-i qan aınalym júıesi aýrýlarymen aýyrǵan naýqastar, 3 177-si jazataıym oqıǵaǵa tap bolǵandar, ýlanǵandar, 1 458-i basqa aýrýlardan zardap shekkender.

Eske sala keteıik, 30 tamyz kúni sanıtarııalyq avıatsııa Reseıdiń Taýly Altaı ólkesinde jol apatyna ushyraǵan Qazaqstan azamaty Hasen Bilimbaıdy Almatynyń №4 qalalyq aýrýhanasyna jetkizgen bolatyn.