Qazaqstanda salynǵan temirjol uzyndyǵy TMD elderiniń bárin qosa alǵandaǵydan asyp tústi - Premer-mınıstr

ASTANA. 2 tamyz. QazAqparat - Táýelsizdik jyldary Qazaqstanda salynǵan temirjol qurylysy osy kezeńdegi TMD elderiniń bárin qosa alǵandaǵy temir joldardan asyp tústi. Búgin Astanadaǵy «Qazaqstan temir joly» UK AQ ǵımaratynda ótken Qazaqstannyń kólik qyzmetkerleriniń kúnine arnalǵan saltanatty jıynda QR Premer-Mınıstri Serik Ahmetov osylaı málimdedi.

Sóz arasynda Úkimet basshysy táýelsizdik jyldary temirjol salasynda aýqymdy sharalar atqarylǵanyn aıta kele, bul salanyń ekonomıkanyń tutastyǵyn qamtamasyz etýge zor septigin tıgizetinine toqtalyp ótti. «Qazaqstan arqyly Qytaı men Eýropalyq elderdi, TMD men Parsy shyǵanaǵy elderiniń kóliktik nópirin qamtamasyz etetin iri transqurlyqtyq marshrýttar ótedi. Táýelsizdik jyldary Qazaqstanda salynǵan temirjol qurylysy osy kezeńdegi TMD elderiniń bárin qosa alǵandaǵy temir joldardan asyp tústi. Salynǵan jáne salynyp jatqan temirjoldardyń jalpy uzyndyǵy 2,5 shaqyrymdy qurap otyr», - dedi S. Ahmetov.

Sonymen qatar, Úkimet basshysy aǵymdaǵy jyldyń mamyr aıynda Qazaqstan men Túrkimenstan memleketteriniń basshylary eki eldi baılanystyratyn tikeleı temirjol qatynastaryn resmı túrde ashqanyn atap ótti. Al 2012 jyly jalpy uzyndyǵy 2200 shaqyrymdy quraıtyn Jezqazǵan-Beıneý, Arqalyq-Shubarkól baǵyttarynda da shoıynjol qurylysy bastaldy. «Bul jobalardy júzege asyrý ortalyq Reseı men soltústik Qazaqstandy Ortalyq Azııa elderimen, Iranmen baılanystyratyn bolady. Jańa joba bizdiń elimiz úshin asa mańyzdy. Biz batys jáne shyǵys óńirlerdi Qazaqstannyń ortalyq aımaǵymen temirjol qatynastary arqyly qosatyn bolamyz. Buny el de, eldiń kásipkerleri de asyǵa kútip otyr», - dedi Premer-Mınıstr.

Saltanatty jıyn barysynda Úkimet basshysy S. Ahmetov pen «Qazaqstan temir joly» UK prezıdenti A. Mámın temirjol qyzmetindegi kópjylǵy eńbegi men salanyń damýyna qosqan jeke úlesi úshin birqatar azamattardy «Qurmetti temirjolshy» belgisimen marapattady.