Qazaqstanda salynǵan keıbir elshilikterdiń syrtqy sıpaty sol ǵımaratty salǵyzǵan memlekettiń ózderine unamaı otyr - Q. Sarybaı

Búgin Parlament Senatynyń jalpy otyrysynda Qazaqstan men Ázirbaıjan arasyndaǵy dıplomatııalyq ókildikterdiń ǵımarattaryn salý úshin jer ýchaskelerin berý týraly kelisimdi talqylaý barysynda Syrtqy ister mınıstriniń orynbasary Qaırat Sarybaı osylaı málim etti.

Eske salsaq, talqylaý barysynda senator Orynbaı Rahmanberdıev Astanada salynyp jatqan basqa shet memleketterdiń elshilik ǵımarttarynyń sáýlet-kelbetine qatysty synı másele kótergen bolatyn. «Budan ilgeride Astananyń qaq ortasynda Reseı Elshiliginiń ǵımaraty salyndy. Soǵan qarasańyz eshbir arhıtektýralyq qundylyq joq, jaı bir soldattyń jataqhanasyna uqsaǵan ǵımarat qana. Al alda salynatyn elshilikterdiń sáýleti qalaı bolady? Olar bizdiń sáýletshilermen kelise me? Astananyń arhıtektýrasymen kez kelgen ǵımarat úılesip turýy shart qoı», - dedi senator O. Rahmanberdıev.

Óz jaýabynda mınıstrdiń orynbasary Qaırat Sarybaı elshilik ǵımarattaryn salý barysynda elimizde qabyldanǵan qurylys normatıvteriniń bári saqtalatynyn jetkizdi. «Alaıda, ǵımaratty árleý, ony ulttyq naqyshpen órnekteý sekildi basqa da erekshelikter salyp jatqan shet memlekettiń úkimetiniń sharýasy. Biz oǵan aralasa almaımyz. Meniń oıymsha, siz aıtyp otyrǵan keıbir elshilikterdiń syrtqy sıpaty sol elshilikti salǵan, soǵan qarajat jumsaǵan shet el úkimetteriniń ózderiniń de narazylyqtaryn týdyrýda. Bul ras. Sondyqtan keıbir elshilikter ǵımaratynyń syrtqy sıpaty ony saldyrǵandardyń ózderine unamaı otyr», - dedi Q. Sarybaı.

Bul rette SІM ókiliniń aıtýynsha, eger Qazaqstan Baký qalasynda óz elshiligine ǵımarat salatyn bolsa ony sol eldiń qoldanystaǵy normatıvterimen turǵyzý shart, degenmen syrtqy arhıtektýrasyn qazaqtyń úlgisimen, oıý-órnegimen salýǵa bolady. «Sol sekildi Astanada salynatyn sheteldik elshilik ǵımarattary sol ulttyń, eldiń mádenıetin, sáýletin qamtysa onyń esh aıyby joq. Bul meniń oıymsha, Astananyń kórkine de ózindik úılesim qosady, qalamyzdyń naǵyz eýrazııalyq sıpatyn pash etedi», - dedi ol.