Qazaqstanda salyqtyq baqylaý júıesine jasandy ıntellekt qoldanylmaq

NUR-SULTAN. QazAqparat - Qazaqstanda salyqtyq baqylaý júrgizýdi irikteý úshin jasandy ıntellekt qoldanylmaq. Bul týraly Memlekettik kirister komıteti iri salyq tóleýshiler departamentiniń dırektory Anýar Súleımenov aıtty, dep habarlaıdy QazAqparat tilshisi.

«Salyqtyq tekserýler sııaqty preventıvti baqylaý is-sharalarmen qatar Memlekettik kirister komıteti is júzinde salyq salynatyn bazany – iri salyq tóleýshilerdi monıtorıngteýdi aıqyndaý maqsatynda qarjy-sharýashylyq qyzmetke taldaýdy júzege asyrady. Qazirgi ýaqytta monıtorıng Salyq kodeksiniń 132-babyna sáıkes júzege asyrylady. Onda aldyn ala júrgizilgen taldaý boıynsha alshaqtyqtar anyqtalǵan jaǵdaıda salyqtardy jáne bıýdjetke tólenetin basqa da mindetti tólemderdi esepteýdiń durystyǵyn rastaıtyn qujattardy usyný týraly talap qoıylady», - dedi departament dırektory Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, odan keıin buzýshylyqtar anyqtalǵan jaǵdaıda iri salyq tóleýshige jazbasha túsindirme berý quqyǵy berilip, osyndaı buzýshylyqtar týraly habarlanady. Usynylǵan túsindirmemen kelispegen jaǵdaıda ǵana memlekettik kirister organy ýájdemeli sheshim shyǵarady jáne belgilengen buzýshylyqtar máselesi boıynsha salyqtyq tekserýdi taǵaıyndaıdy.

«2021 jyly iri salyq tóleýshilerdiń monıtorıngin ońtaılandyrý úshin eń úlken táýekelderi bar iri salyq tóleýshilerdiń nysanaly toptary aıqyndaldy. Máselen, salyqtyq monıtorıng aıasynda 17 talap qoıyldy. Júrgizilgen jumys nátıjesinde salyqtyq túsimder 42,3 mlrd teńgeni qurady. Bul ótken jylǵa qaraǵanda 35,5 mlrd teńgege artyq. Qazirgi ýaqytta komıtet fıskaldyq ákimshilendirýdi tsıfrlandyrý boıynsha aýqymdy jumys júrgizýde. Salyqtyq baqylaý júrgizýge irikteý úshin jasandy ıntellekt qoldana otyryp qurylǵan táýekelderdi baǵalaý júıesiniń taldamasy negiz bolady», - dedi Anýar Súleımenov.